११ अषाढ, काठमाडौं । प्रधानमन्त्री बालेन्द्र शाह ‘बालेन’ नेतृत्वको सरकारले व्यवसायी दुर्गा प्रसाईँ विरुद्ध दायर गरिएको राज्यविरुद्धको कसुरसम्बन्धी मुद्दा फिर्ता लिने तयारी गरेको छ।
उच्च सरकारी स्रोतका अनुसार प्रधानमन्त्री तथा मन्त्रिपरिषद्को कार्यालयले गृहसचिवलाई उक्त मुद्दा फिर्ता लिन आवश्यक कानुनी प्रक्रिया अघि बढाउन निर्देशन दिइसकेको छ। सरकारको निर्णय कार्यान्वयन भएमा प्रसाईँसँगै सोही प्रकरणमा मुद्दा खेपिरहेका धवलशमशेर जबरा, रविन्द्र मिश्र लगायत अन्य प्रतिवादीले पनि राहत पाउने भएका छन्।
२०८१ चैत १५ गते काठमाडौंको तीनकुने क्षेत्रमा भएको प्रदर्शन हिंसात्मक बनेपछि तत्कालीन प्रधानमन्त्री केपी शर्मा ओली नेतृत्वको सरकारले प्रसाईँसहित ६१ जनाविरुद्ध विभिन्न अभियोगमा मुद्दा दायर गरेको थियो। उक्त घटनामा दुई जनाको मृत्यु भएको थियो भने निजी घर, सरकारी सवारीसाधन तथा सार्वजनिक संरचनामा आगजनी र तोडफोड भएको थियो।
सरकारी वकिलको कार्यालयले ५० जनाविरुद्ध आपराधिक उपद्रव, राज्यविरुद्धको कसुर तथा संगठित अपराधसम्बन्धी अभियोग लगाएको थियो। त्यसमध्ये प्रसाईँसहित ८ जनाविरुद्ध कर्तव्य ज्यान र ज्यान मार्ने उद्योगसम्बन्धी मुद्दासमेत दायर गरिएको थियो। अन्य ११ जनाविरुद्ध आपराधिक उपद्रवको अभियोग लागेको थियो। पछि उनीहरू सबै धरौटीमा रिहा भएका थिए।
सरकारले मुद्दा फिर्ता लिने निर्णयलाई औपचारिकता दिएमा यसले राजनीतिक र कानुनी वृत्तमा नयाँ बहस सिर्जना गर्ने देखिएको छ। यद्यपि, मुद्दा फिर्ता सम्बन्धी अन्तिम निर्णय कानुनी प्रक्रिया पूरा भएपछि मात्रै प्रभावकारी हुने बताइएको छ।
