श्रावण २५, जनकपुरधाम। धनुषा जिल्लाका देवडिहा गाउँका युवा वैज्ञानिक सतिष चन्द झा आफ्नो असाधारण प्रतिभा र ११० भन्दा बढी आविष्कारका कारण विश्व विज्ञान क्षेत्रमा चम्किरहेका छन्। जनकपुरधामका यो प्रतिभाशाली वैज्ञानिकले नेपाल मात्र होइन, अन्तर्राष्ट्रिय स्तरमा पनि नेपाली विज्ञानको प्रतिष्ठा बढाएका छन्।
सन् २०१३ मा क्यानडाको प्रतिष्ठित विश्वविद्यालयबाट पीएचडी प्राप्त गरेका झा हाल अमेरिकामा एक अग्रणी इन्टरनेट कर्पोरेट कम्पनीमा वरिष्ठ अनुसन्धानकर्ता वैज्ञानिकको रूपमा कार्यरत छन्। उनले 5G मोबाइल नेटवर्क, इन्टेलिजेन्ट डेटा व्यवस्थापन, र नेटवर्क अनुकूलन जस्ता अत्याधुनिक प्रविधिमा उल्लेखनीय योगदान दिएका छन्।
उनका आविष्कारहरूले विश्व विज्ञान तथा प्रविधि क्षेत्रमा क्रान्तिकारी परिवर्तन ल्याएको भन्दै विभिन्न राष्ट्रिय तथा अन्तर्राष्ट्रिय संस्थाबाट सतिषलाई सयौं सम्मान प्रदान गरिएको छ। विशेष गरी सन् २००७ र २०१९ मा प्राप्त महत्वपूर्ण सम्मानहरूले उनको दीर्घकालीन अनुसन्धान र समर्पणलाई प्रमाणित गरेका छन्।
झाका आविष्कार र अनुसन्धानले विकासशील मुलुक नेपालका लागि नयाँ सम्भावनाका ढोका खोलेको छ। प्रविधिमा सुधार ल्याउनुका साथै उनले नयाँ पुस्तालाई विज्ञान र अनुसन्धानतर्फ प्रेरित गर्न महत्वपूर्ण भूमिका खेलेका छन्।
सतिष चन्द झाले निकट भविष्यमा अझ व्यापक अनुसन्धान र नवीन आविष्कार गर्दै नेपाललाई विश्व विज्ञान मञ्चमा थप उचाइमा पुर्याउने दृढ संकल्प व्यक्त गरेका छन्। विज्ञान र प्रविधिको तीव्र गतिमा अघि बढिरहेको यो युगमा उनका योगदानलाई अनमोल मानिन्छ।
