८ कात्तिक , काठमाडौ । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले विवादित अडियो प्रकरणमा आफ्नो संलग्नता अस्वीकार गर्दै आफूलाई कृत्रिम बुद्धिमत्ता (एआई) प्रयोग गरेर फसाउन खोजिएको दाबी गरेका छन्।
सुनारले अडियोमा सुनिएको आवाज आफ्नो नभएको जिकिर गर्दै पार्टीको अनुशासन आयोगमा लिखित स्पष्टीकरण बुझाएका हुन्। उनले प्रहरीभित्रको भ्रष्टाचारबारे आवाज उठाएपछि आफूलाई निशाना बनाइएको आरोपसमेत लगाएका छन्।
यद्यपि, विवादित अडियोको वास्तविकता र त्यसमा सुनिएको आवाजको पहिचानबारे अहिलेसम्म आधिकारिक पुष्टि भएको छैन।
प्रकरणको छानबिन गरिरहेको रास्वपाको समितिले जनआस्था पत्रिकाबाट सम्पादन नगरिएको अडियो प्राप्त गरेको छ। समितिले विवादित संवादमा सुनिएकी भनिएकी महिलाको न्युज २४ टेलिभिजनमा प्रसारित अन्तर्वार्ताको सामग्रीसमेत माग गरेको छ।
छानबिन समितिका संयोजक हरिचन्द्र भट्टराईका अनुसार अडियोको प्राविधिक परीक्षण गरिनेछ। आवश्यक परे यसका लागि विशेषज्ञ निकायको सहयोगसमेत लिइने उनले बताएका छन्।
विवादित अडियो प्रकरणमा छानबिन टुंगो नलागेसम्म सुनारलाई सांसदका रूपमा औपचारिक सार्वजनिक कार्यक्रममा सहभागी हुन रोक लगाइएको छ।
अडियोको प्रामाणिकता, त्यसमा सुनिएको आवाजको पहिचान र एआई प्रयोग भएको वा नभएको विषय प्राविधिक परीक्षणपछि मात्रै स्पष्ट हुने देखिन्छ।
