२४ भदौ, काठमाडौ । नेकपा एमालेका सचिव महेश बस्नेतले विघटित प्रतिनिधिसभा पुनर्स्थापनाको विषय पार्टीको आगामी आन्दोलनको प्रमुख एजेन्डा बन्न सक्ने बताएका छन्।
बुधबार भक्तपुरको गुण्डुमा आयोजित कार्यक्रममा बोल्दै बस्नेतले जेनजी आन्दोलनपछि विघटन भएको प्रतिनिधिसभा पुनर्स्थापनाका लागि आन्दोलन गर्नुपर्ने अवस्था आउन सक्ने बताएका हुन्।
उनका अनुसार आगामी असोज ६ र ७ गते बस्ने एमालेको पार्टी बैठकमा संसद् पुनर्स्थापनाको विषयमा गम्भीर छलफल हुनेछ। उनले विगतमा पनि राजनीतिक प्रतिगमन सच्याउन संसद् पुनर्स्थापनाको बाटो अपनाइएको स्मरण गर्दै अहिले पनि संसद् पुनर्स्थापना महत्वपूर्ण राजनीतिक कदम हुन सक्ने बताए।
संसद् पुनर्स्थापनाको विषय सर्वोच्च अदालतमा विचाराधीन रहेकाले यसबारे कानुनी र राजनीतिक दुवै पक्षबाट छलफल गरिने उनको भनाइ छ।
यसैबीच बस्नेतले प्रधानमन्त्री बालेन्द्र शाहलाई संयुक्त राष्ट्रसंघको महासभाबाट फर्किएलगत्तै राजीनामा दिन सुझाव दिएका छन्। उनले वर्तमान सरकार लामो समय टिक्दा मुलुकले थप क्षति व्यहोर्नुपर्ने दाबी गरे।
प्रधानमन्त्रीले राजीनामा नदिए पुनः आन्दोलन घोषणा गर्ने चेतावनी दिँदै बस्नेतले संसद् पुनर्स्थापनासहितका विषय आगामी आन्दोलनका प्रमुख एजेन्डा बन्न सक्ने बताएका छन्।
उनले भने, “राजीनामा नदिए दोस्रो भदौ २३ र २४ गतेजस्तै आन्दोलनको घोषणा हुनेछ।”
