१३ भदौ, काठमाडौ । रसुवा–भोटेकोशी क्षेत्रमा आएको विनाशकारी बाढीमा परी मृत्यु हुनेको संख्या ६२६ पुगेको छ। आज बिहान १० बजेसम्म ६२६ वटा शव फेला परेको जानकारी प्राप्त भएको छ।
बाढी तथा पहिरोका कारण ठूलो जनधनको क्षति भएको छ भने २ हजार ४२६ जना मानिस अझै सम्पर्कविहीन रहेको बताइएको छ।
बाढी प्रभावित विभिन्न क्षेत्रमा नेपाली सेना, नेपाल प्रहरी र सशस्त्र प्रहरीसहितका सुरक्षा निकाय तथा उद्धार टोलीले खोजी तथा उद्धार कार्यलाई निरन्तरता दिएका छन्। जोखिमपूर्ण भौगोलिक अवस्था, सडक तथा पुलमा भएको क्षति र नदीमा बढिरहेको पानीका कारण उद्धार तथा खोजी कार्यमा चुनौती देखिएको छ।
सम्पर्कविहीन व्यक्तिहरूको खोजी तथा बेपत्ताको विवरण संकलन गर्ने कामसमेत भइरहेको छ। प्रभावित क्षेत्रमा उद्धार, राहत तथा पुनःस्थापनाका लागि सरकारी निकाय, सुरक्षा निकाय तथा विभिन्न संघ–संस्थाहरू परिचालन भएका छन्।
बाढी प्रभावित नदी तटीय क्षेत्रका बासिन्दालाई उच्च सतर्कता अपनाउँदै सुरक्षित स्थानमा रहन प्रशासनले आग्रह गरेको छ।
