१ भदौ,काठमाडौं । प्रतिनिधिसभाकी उपसभामुख रुबी ठाकुरले जनआस्थाका प्रधान सम्पादक किशोर श्रेष्ठविरुद्ध चरित्र हत्या तथा आफ्नो प्रतिष्ठामा आँच पुर्याएको आरोप लगाउँदै जिल्ला प्रहरी परिसर ललितपुरमा जाहेरी दिएकी छन्।
ठाकुरले जनआस्थामा प्रकाशित सामग्रीले आफ्नो चरित्र तथा सामाजिक प्रतिष्ठामा असर पुर्याएको दाबी गर्दै विद्युतीय कसुरसम्बन्धी कानुनअनुसार अनुसन्धान गरी आवश्यक कारबाही गर्न माग गरेकी हुन्।
जिल्ला प्रहरी परिसर ललितपुरले जाहेरी प्राप्त भएको पुष्टि गर्दै त्यसबारे अध्ययन भइरहेको जनाएको छ। जाहेरीमा प्रकाशित सामग्रीका कारण आफ्नो सार्वजनिक तथा व्यक्तिगत प्रतिष्ठामा क्षति पुगेको ठाकुरको दाबी छ।
यसअघि सांसद अमरकान्त चौधरीसँग सम्बन्धित सामग्री प्रकाशन गरेको विषयमा प्रहरीले श्रेष्ठलाई पक्राउ गरेको थियो। उक्त पक्राउविरुद्ध परेको बन्दी प्रत्यक्षीकरणको रिटमा सर्वोच्च अदालतले श्रेष्ठलाई रिहा गर्न आदेश दिएको थियो।
उपसभामुख ठाकुरको जाहेरीसँगै जनआस्था साप्ताहिकमा प्रकाशित सामग्री र त्यसले कानुनी तथा व्यक्तिगत प्रतिष्ठामा पारेको असरबारे फेरि विवाद चर्किएको छ। प्रहरीले जाहेरीमाथि अध्ययनपछि कानुनअनुसार प्रक्रिया अघि बढाउने जनाएको छ।
