२५ चैत, काठमाडौ ।— संयुक्त राज्य अमेरिका र इरान बीच चर्किँदै गएको तनाव तत्कालका लागि मत्थर भएको छ। दुवै देश दुई साताका लागि ससर्त युद्धविराममा सहमत भएका छन्, जसले विश्वभर फैलिएको युद्धको त्रास केही समयका लागि कम भएको छ।
यो सहमति विशेषतः हर्मुज जलडमरूमध्य बाट व्यापारिक जहाज सञ्चालन सुचारु राख्ने सर्तमा आधारित रहेको जनाइएको छ। विश्व ऊर्जा आपूर्तिको मुख्य मार्ग मानिने उक्त क्षेत्र सुरक्षित राख्न दुवै पक्षले प्रतिबद्धता जनाएका छन्।
यसअघि डोनाल्ड ट्रम्प ले “सभ्यता नै सिध्याइदिने” चेतावनी दिएपछि तनाव थप चर्किएको थियो। त्यसपछि कूटनीतिक पहल तीव्र बनेको थियो।
युद्धविराम गराउन पाकिस्तान ले मध्यस्थकर्ताको भूमिका खेलेको बताइएको छ। पाकिस्तानको पहलपछि दुवै देश वार्तामा बस्न सहमत भएका हुन्।
अन्तर्राष्ट्रिय समुदायले यस कदमलाई सकारात्मक रूपमा लिएको छ। यद्यपि यो अस्थायी सहमति भएकाले दीर्घकालीन शान्तिका लागि थप कूटनीतिक प्रयास आवश्यक रहेको छ।
