५ कात्तिक , कठमान्डौ। PHP प्रोग्रामिङ प्रणालीमा भेटिएका दुई गम्भीर सुरक्षा कमजोरीबारे विश्वव्यापी चेतावनी जारी भएपछि नेपालका विभिन्न सरकारी वेबसाइटहरू पहुँचबाहिर रहेको विवरण सार्वजनिक भएको छ।
प्राप्त विवरणअनुसार राष्ट्रपति कार्यालय, प्रधानमन्त्री तथा मन्त्रिपरिषद्को कार्यालय, विभिन्न मन्त्रालय र स्थानीय तहका वेबसाइटहरू प्रयोगकर्ताले खोल्न नसक्ने अवस्थामा पुगेका छन्। यद्यपि, वेबसाइटहरू बन्द हुनु र PHP का सुरक्षा कमजोरीबीच प्रत्यक्ष सम्बन्ध रहेको विषयमा आधिकारिक पुष्टि हुन बाँकी छ।
साइबर सुरक्षा विज्ञहरूका अनुसार PHP मा देखिएका यस्ता कमजोरीको उचित व्यवस्थापन नगरिएमा आक्रमणकारीले प्रभावित सर्भरमा टाढैबाट हानिकारक कोड चलाउन, सर्भरमाथि नियन्त्रण कायम गर्न तथा संवेदनशील तथ्यांकमा अनधिकृत पहुँच प्राप्त गर्न सक्ने जोखिम हुन्छ।
सरकारी निकायका वेबसाइटहरूमा नागरिकका महत्त्वपूर्ण सूचना तथा सार्वजनिक सेवा सम्बन्धी विवरण रहने भएकाले यस्ता सुरक्षा जोखिमले सरकारी डिजिटल सेवाको विश्वसनीयता र तथ्यांक सुरक्षामाथि गम्भीर प्रश्न उठाउन सक्छ।
साइबर सुरक्षा जोखिम न्यूनीकरणका लागि प्रभावित प्रणालीको प्राविधिक परीक्षण, सुरक्षा कमजोरीको पहिचान, सम्बन्धित सफ्टवेयर अद्यावधिक तथा सर्भरको सुरक्षा अवस्था सुनिश्चित गर्नु आवश्यक हुन्छ।
सरकारी वेबसाइटहरू पहुँचबाहिर हुनुको वास्तविक कारण, प्रभावित प्रणालीको संख्या र सुरक्षा कमजोरीका कारण कुनै अनधिकृत पहुँच वा तथ्यांक चुहावट भएको छ वा छैन भन्नेबारे सम्बन्धित सरकारी निकायको आधिकारिक विवरण सार्वजनिक हुन बाँकी छ।
