१७ भदौ, काठमाडौ । रसुवाको भोटेकोशीमा आएको विनाशकारी बाढीपछि हालसम्म १ हजार २०४ जनाको मृत्यु भएको छ भने करिब ४ हजार १९६ जना अझै सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। प्राधिकरणले २०८३ भदौ १७ गते साँझ ६ बजेसम्मको खोज, उद्धार तथा राहतसम्बन्धी विवरण सार्वजनिक गरेको हो।
प्राधिकरणका अनुसार बाढीमा परी मृत्यु हुनेमा रसुवामा ११५, नुवाकोटमा १५५, धादिङमा १६०, गोरखामा ६२, तनहुँमा ३५, नवलपरासी पूर्वमा २१७, नवलपरासी पश्चिममा २०२ र चितवनमा ३५८ जना रहेका छन्। विभिन्न स्थानबाट ४५ वटा शवको पहिचान हुन बाँकी रहेको छ।
बाढीमा ३०९ जना घाइते भएका छन्। विभिन्न अस्पतालबाट उपचारपछि १५५ जना डिस्चार्ज भएका छन् भने नेपाली सेनाबाट ३ हजार १११ र सशस्त्र प्रहरीबाट १ हजार ६२८ जनाले स्वास्थ्य उपचार पाएका छन्।
करिब १२ हजारको उद्धार
सरकारले हालसम्म ११ हजार ९९३ जनाको उद्धार गरेको प्राधिकरणले जनाएको छ। नेपाली सेनाले हवाई माध्यमबाट विदेशी २७३ र नेपाली ४ हजार ९०१ जनाको उद्धार गरेको विवरणमा उल्लेख छ। सेनाले हालसम्म ६९० पटक हवाई उडान गरेको छ भने निजी क्षेत्रबाट काठमाडौंमा २९ वटा उडान भएका छन्।
उद्धार तथा खोजी कार्यका लागि नेपाल प्रहरी, नेपाली सेना र सशस्त्र प्रहरीसहित १३ हजार ३९४ सुरक्षाकर्मी परिचालन गरिएको छ।
३ हजार ४५३ जना होल्डिङ सेन्टरमा
बाढी प्रभावित क्षेत्रबाट उद्धार गरिएकामध्ये ३ हजार ४५३ जना होल्डिङ सेन्टरमा रहेका छन्। तीमध्ये नुवाकोटमा २ हजार ४६६, धादिङमा २६०, रसुवामा ३९८ र काठमाडौंमा ३२९ जना रहेका छन्।
राहत वितरणका लागि प्रभावित क्षेत्रमा ४४ ट्रक र ३७ बोलेरोमार्फत खाद्य तथा गैरखाद्य सामग्री पठाइएको छ। हेलिकप्टरबाट पनि राहत सामग्री ढुवानी गरिएको प्राधिकरणले जनाएको छ।
यसैगरी प्रभावित क्षेत्रमा इन्धनको आपूर्ति कायम राख्न ३४ हजार लिटर डिजेल, १६ हजार लिटर पेट्रोल र ७ हजार लिटर हवाई इन्धन मौज्दात रहेको विवरणमा उल्लेख छ। सञ्चारतर्फ नेपाल टेलिकमका ११० टावर र एनसेलका ७८ टावर प्रभावित भएका छन्।
सरकारले नगद राहत पनि वितरण गर्यो
सरकारले रसुवामा १ करोड, नुवाकोटमा १ करोड र धादिङमा ५० लाख रुपैयाँ नगद राहत उपलब्ध गराएको छ। साथै प्रभावित १५ पालिकालाई ६ करोड ७५ लाख रुपैयाँ निकासा गरिएको प्राधिकरणको विवरणमा उल्लेख छ।
बाढीपछि ४ हजारभन्दा बढी व्यक्ति अझै सम्पर्कविहीन रहेकाले खोजी तथा उद्धार कार्यलाई थप तीव्र बनाइएको छ। विशेषगरी जलविद्युत् आयोजनाका सुरुङ तथा जोखिमपूर्ण क्षेत्रमा फसेकाहरूको खोजीलाई प्राथमिकतामा राखिएको छ। पछिल्लो समय पनि प्रभावित क्षेत्रमा नेपाली तथा अन्तर्राष्ट्रिय टोलीको संयुक्त उद्धार प्रयास जारी रहेको छ।
