माघ १४, मुम्बई । — भारतको महाराष्ट्र राज्यका उपमुख्यमन्त्री अजित पवार विमान दुर्घटनामा परी निधन भएको पुष्टि भएको छ। बारामती नजिकै अवतरणका क्रममा भएको दुर्घटनामा विमानमा सवार सबै पाँच जनाको मृत्यु भएको भारतीय सञ्चारमाध्यमहरूले जनाएका छन्।
विमानमा अजित पवारसहित उनका एक व्यक्तिगत सुरक्षा अधिकारी (पीएसओ), एक सहायक तथा दुई क्रु सदस्य सवार थिए। दुर्घटनामा कोही पनि जीवित बच्न नसकेको बताइएको छ।
प्रारम्भिक जानकारीअनुसार विमान ल्यान्डिङका क्रममा दुर्घटनाग्रस्त भएको हो। दुर्घटनाको यकिन कारण खुल्न बाँकी रहेकाले सम्बन्धित निकायले अनुसन्धान सुरु गरेका छन्।
अजित पवार जिल्ला परिषद् निर्वाचनसम्बन्धी एक र्यालीमा सहभागी हुन बारामती जाँदै थिए। तर दुर्घटनाका कारण उनी उक्त कार्यक्रममा पुग्न सकेनन्। मंगलबार साँझ मात्र उनी मुम्बईमा मुख्यमन्त्री देवेन्द्र फडणवीससँगै क्याबिनेट कमिटीको बैठकमा सहभागी भएका थिए।
अजित पवारलाई महाराष्ट्र राजनीतिमा प्रभावशाली र सशक्त नेताका रूपमा चिनिन्थ्यो। उनी चार फरक मुख्यमन्त्रीसँग काम गर्दै कुल छ पटक उपमुख्यमन्त्री बनेका थिए। लामो समय सत्ता समीकरणको केन्द्रमा रहेका कारण उनलाई “अजित दादा” भनेर सम्बोधन गरिन्थ्यो।
उनको निधनले महाराष्ट्रको राजनीतिमा ठूलो शून्यता सिर्जना भएको विश्लेषण गरिएको छ। शरद पवार परिवारका लागि पनि यो ठूलो धक्का मानिएको छ। पछिल्ला दिनमा उनी परिवारभित्र एकता कायम गर्न सक्रिय रहेको बताइन्छ।
मुख्यमन्त्री बन्ने इच्छा व्यक्त गर्दै आएका अजित पवारको त्यो आकांक्षा भने अपूरै रह्यो। उनी महाराष्ट्रमा सबैभन्दा लामो समय उपमुख्यमन्त्री रहने नेतामध्ये एकका रूपमा चिनिन्छन्।
दुर्घटनाको विस्तृत कारणबारे अनुसन्धान जारी रहेको भारतीय अधिकारीहरूले बताएका छन्।
