१८ भदौ , काठमाडौ । सरकारले आगामी भदौ २२ गते राष्ट्रिय शोक घोषणा गर्ने भएको छ । बिहीबार बसेको मन्त्रिपरिषद् बैठकले रसुवा बाढीमा ज्यान गुमाएकाहरूको १३औँ दिनको पुण्यतिथिका अवसरमा राष्ट्रिय शोक घोषणा गर्ने निर्णय गरेको हो ।
सरकारका प्रवक्ता तथा शिक्षा तथा खेलकुदमन्त्री सस्मित पोखरेलका अनुसार भदौ २२ गते राष्ट्रिय शोकका अवसरमा सरकारी कार्यालय तथा विदेशस्थित नेपाली दूतावास र नियोगहरूमा राष्ट्रिय झण्डा आधा झुकाइनेछ ।
त्यस्तै, सरकारले भदौ २३ गते ‘जेन–जी सहिद दिवस’का अवसरमा नेपालभर सार्वजनिक बिदा दिने निर्णय गरेको छ । मन्त्रिपरिषद् बैठकले उक्त दिन देशभरका सरकारी कार्यालय तथा सार्वजनिक निकायमा बिदा दिने निर्णय गरेको प्रवक्ता पोखरेलले जानकारी दिए ।
सरकारले रसुवा बाढीमा परी ज्यान गुमाएकाहरूको सम्मान तथा ‘जेन–जी सहिद’हरूको सम्झनामा शोक र सम्मानस्वरूप उक्त निर्णय गरेको जनाएको छ ।
