६ साउन, काठमाडौ । — प्रधानमन्त्री बालेन्द्र शाह (बालेन) को सक्रियतापछि नेपाली सेयर बजारमा उल्लेखनीय सुधार देखिएको दाबी गरिएको छ। पछिल्ला तीन कारोबार दिनमा नेपाल स्टक एक्सचेन्ज (नेप्से) परिसूचक १२८ अंकले बढ्दा लगानीकर्ताको सम्पत्तिमा करिब २ खर्ब १४ अर्ब रुपैयाँले वृद्धि भएको बताइएको छ।
नयाँ सरकार गठनपछि सेयर बजार निरन्तर ओरालो लाग्दा लगानीकर्ताले करिब ५ खर्ब रुपैयाँ बराबरको सम्पत्ति गुमाएको अनुमान गरिएको थियो। त्यसपछि प्रधानमन्त्री शाहले व्यवसायी तथा लगानीकर्तासँग छलफल गर्नुका साथै नेपाल राष्ट्र बैंकका गभर्नर विश्व पौडेलसँग भेट गरी बजारको अवस्थाबारे गम्भीर चासो व्यक्त गर्नुभएको थियो।
प्रधानमन्त्रीको उक्त पहलपछि बजारमा सकारात्मक मनोविज्ञान बनेको र त्यसको प्रभावस्वरूप नेप्सेमा लगातार हरियाली देखिएको दाबी गरिएको छ। बिहीबारयता नेप्से परिसूचक १२८ अंकले बढ्दै कुल बजार पुँजीकरण करिब ४६ खर्ब ८५ अर्ब रुपैयाँ पुगेको जनाइएको छ।
यद्यपि, सेयर बजारको उतारचढावमा सरकारी पहलसँगै लगानीकर्ताको मनोबल, मौद्रिक नीति, ब्याजदर, कम्पनीहरूको वित्तीय अवस्था तथा समग्र आर्थिक गतिविधिलगायत विभिन्न कारकले पनि प्रभाव पार्ने विश्लेषकहरू बताउँछन्।
