३ कात्तिक , जनकपुरधाम। नेपालीहरूको महान् पर्व बडादशैँको नवौँ दिन आज नवदुर्गाको अन्तिम स्वरूप माता सिद्धिदात्री देवीको पूजा–आराधना गरी मनाइँदैछ। तिथिको घटबढका कारण अष्टमी दुई दिन परेकाले नवमीको पूजा आज गरिँदैछ।
सिद्धिदात्रीलाई नवदुर्गाको अन्तिम स्वरूपका रूपमा लिइन्छ। धार्मिक मान्यताअनुसार माता सिद्धिदात्रीको आराधना गर्नाले भक्तजनले सिद्धि, शान्ति, समृद्धि तथा आध्यात्मिक ज्ञान प्राप्त गर्ने विश्वास छ। देवीलाई शक्ति, ब्रह्मानन्द र मोक्षकी प्रतीकका रूपमा समेत पूजा गर्ने परम्परा रहेको छ।
नवमीको अवसरमा आज जनकपुरधामका विभिन्न शक्तिपीठ तथा देवी मन्दिरहरूमा बिहानैदेखि भक्तजनहरूको भीड लागेको छ। भक्तजनहरूले विधिपूर्वक पूजाअर्चना गर्दै परिवारको सुख, शान्ति, दीर्घायु र समृद्धिको कामना गरिरहेका छन्। यस अवसरमा विशेष पूजाआजा, बलि तथा प्रसाद चढाउने परम्परासमेत रहेको छ।
बडादशैँअन्तर्गत नवरात्रिको अन्तिम दिनका रूपमा मनाइने महानवमीमा देवी दुर्गाको विशेष आराधना गरिन्छ। नवमीको पूजा सम्पन्न भएसँगै भोलिपल्ट मनाइने विजयादशमी अर्थात् टीका–जमरा ग्रहण गर्ने पर्वको तयारीमा भक्तजनहरू जुट्ने परम्परा रहेको छ।
