२९ भदौ, जनकपुरधाम। मिथिलाञ्चलमा आज लोकपर्व चौरचन (चौठचन्द्र) श्रद्धा र भक्तिपूर्वक मनाइँदैछ। पारिवारिक सुख, समृद्धि, शान्ति तथा निरोगिताको कामना गर्दै मिथिलावासीले आज भगवान् चन्द्रमाको विशेष पूजा–आराधना गर्ने परम्परा छ।
चौरचन पर्वका अवसरमा व्रतालुहरू दिनभर निराहार व्रत बस्ने र साँझ चन्द्रोदयपछि पूजा गर्ने गर्छन्। चन्द्रमा उदाएपछि फलफूल, आफैंले तयार पारेको शुद्ध दूधको खिर, पुरी तथा विभिन्न पकवानलाई अर्घ्यका रूपमा चढाउने प्रचलन रहेको छ।
मिथिला संस्कृतिमा विशेष महत्व बोकेको यस पर्वमा परिवारका सदस्यहरू एकै ठाउँमा भेला भएर चन्द्रमाको पूजा गर्ने तथा प्रसाद ग्रहण गर्ने गर्छन्। चौरचनले पारिवारिक सुख–समृद्धि, स्वास्थ्य र दीर्घायुको कामना गर्ने धार्मिक तथा सांस्कृतिक परम्परालाई निरन्तरता दिँदै आएको छ।
चौरचन पर्वको अवसरमा जनकपुरधाम उपमहानगरपालिकासहित विभिन्न स्थानीय तहले बिदासमेत दिएका छन्। स्थानीय तहले पर्वको सांस्कृतिक तथा धार्मिक महत्वलाई ध्यानमा राख्दै बिदा दिएको जनाइएको छ। बिदाका कारण सरकारी तथा स्थानीय तहअन्तर्गतका कार्यालय र कतिपय शैक्षिक संस्थाहरूमा समेत पर्व मनाउन सहज भएको छ।
मिथिलाञ्चलका विभिन्न गाउँ तथा सहरमा चौरचनका लागि आवश्यक पूजा सामग्री, फलफूल, दूध, दही तथा पकवानको तयारी गरिएको छ। साँझ चन्द्र दर्शनसँगै घर–घरमा विधिपूर्वक पूजा सम्पन्न गरिनेछ।
