श्रावण १९, अमेरिका । अमेरिकाको नर्थ क्यारोलिनामा फेरि एकपटक विमान दुर्घटना भएको छ। शनिबार, २०२५ अगस्ट २ तारिखको साँझ ओक आइल्यान्ड नजिकैको समुद्रमा एक इन्जिन भएको सानो विमान खसेको हो। घटना त्यतिबेला भएको हो जब मानिसहरू आइल्यान्डको किनारमा हिँडडुल गरिरहेका थिए।
प्रत्यक्षदर्शीहरूका अनुसार विमान अकस्मात समुद्रमा खसेपछि तत्काल उद्धार कार्य सुरु गरिएको थियो। उद्धार टोलीले समयमै प्रतिक्रिया जनाएपछि विमानका पाइलटको ज्यान बचाइएको छ। उनी सामान्य घाइते अवस्थामा रहेकाले तट नजिकैको अस्पतालमा प्राथमिक उपचार गरिएको बताइएको छ।
विमानमा मात्र पाइलट सवार रहेको र अरु कोही यात्रु नभएको अधिकारीहरूले पुष्टि गरेका छन्। दुर्घटनामा परेका विमानलाई समुद्रबाट निकाल्न अन्य जहाजहरूको सहयोग लिइएको थियो।
संघीय उड्डयन प्रशासन (FAA) ले उक्त दुर्घटनाको अनुसन्धान सुरु गरिसकेको छ। प्रारम्भिक जानकारीअनुसार, दुर्घटनाको कारण हाल स्पष्ट नभए पनि विमानको प्राविधिक समस्या वा मौसमको कारणले घटना भएको हुनसक्ने अनुमान गरिएको छ।
