असोज २८, काठमाडौ । जेनजी आन्दोलनपछि पहिलोपटक सार्वजनिक भएका नेपाली कांग्रेसका सभापति शेरबहादुर देउवाले उपचारका लागि सिंगापुर जाने तयारी गरेका छन्। देउवा दम्पती भोलि सिंगापुर उड्ने तयारीमा रहेका छन्।
पार्टी स्रोतका अनुसार, सानेपामा आज बसेको नेपाली कांग्रेस केन्द्रीय समिति बैठकपछि देउवाले उपसभापति पूर्णबहादुर खड्कालाई कार्यवाहक सभापतिको जिम्मेवारी दिने औपचारिक घोषणा गर्ने तयारी गरेका छन्। देउवाको अनुपस्थितिमा पार्टी सञ्चालन र संगठनात्मक गतिविधि खड्काले नै हेर्ने व्यवस्था मिलाइने बताइएको छ।
देउवा स्वास्थ्य उपचारका नाममा सिंगापुर जाँदै गरे पनि पछिल्लो राजनीतिक परिस्थितिमा यो यात्राले राजनीतिक अर्थ पनि राख्ने विश्लेषण हुन थालेको छ। हालैको जेनजी आन्दोलनपछि कांग्रेसभित्र नेतृत्वको भूमिकाबारे व्यापक प्रश्न उठिरहेको बेला देउवाको आकस्मिक विदेश प्रस्थानले विभिन्न व्याख्या निम्त्याएको छ।
यसैबीच, कांग्रेसका अर्का नेता तथा पूर्वमन्त्री दीपक खड्का परिवारसहित अमेरिका प्रस्थान गरिसकेका छन्। भदौ २४ गते खड्काको बूढानीलकण्ठस्थित निवासमा लागेको आगलागीपछि घरभित्र ठूलो मात्रामा नेपाली र विदेशी नोट फेला परेका थिए। अहिले सो घटनासँग सम्बन्धित कालोधनबारे अनुसन्धान अघि बढाइएको छ।
एकपछि अर्को नेताले मुलुक छाड्ने क्रम सुरु भइसकेको अवस्थामा प्रधानमन्त्री सुशिला कार्की नेतृत्वको अन्तरिम सरकारको भूमिका र दृढताबारे प्रश्न उठ्न थालेका छन्। संवेदनशील राजनीतिक संक्रमणको यस घडीमा सरकार देशभित्र स्थायित्व, जवाफदेहिता र कानूनको शासन कायम गर्न कत्तिको सक्षम रहन्छ भन्ने विषयमा अहिले राजनीतिक वृत्त र सर्वसाधारणबीच गम्भीर बहस सुरु भएको छ।
राजनीतिक विश्लेषकहरूले हालका गतिविधिलाई “जवाफदेहिताबाट पलायन” को संकेतका रूपमा लिएका छन्। उनका अनुसार, जनआन्दोलनपछि अपेक्षित राजनीतिक सुधारका ठोस कदम नचालिँदा नेताहरूले व्यक्तिगत सुरक्षालाई प्राथमिकता दिन थालेका छन्, जुन लोकतान्त्रिक मूल्यका लागि चिन्ताजनक सन्देश हो।
स्रोतका भनाइअनुसार, देउवा करिब एक हप्तासम्म सिंगापुरमा रहनेछन्। उपचार सकिएपछि उनी देश फर्केर पार्टीभित्र देखिएका असन्तुष्टिहरू सम्बोधन गर्ने तयारीमा रहेको नजिकका नेताहरूको दाबी छ।
