असोज २४, काठमाडौ । राष्ट्रपति रामचन्द्र पौडेलले प्रधानमन्त्री सुशीला कार्की, सरकारका मन्त्रीहरू र विघटित प्रतिनिधि सभामा प्रतिनिधित्व गर्ने प्रमुख राजनीतिक दलका नेताहरूसँग शुक्रबार शितल निवासमा व्यापक छलफल गर्न लागेका छन्। स्रोतका अनुसार बैठक आगामी फागुन २१ गतेका लागि तय गरिएको मध्यावधि निर्वाचन तयारीका सन्दर्भमा केन्द्रित हुनेछ।
जेनजी आन्दोलनपश्चात् प्रधानमन्त्रीमा नियुक्त भएकी सुशीला कार्कीको नेतृत्वमा बनेको सरकारले प्रतिनिधि सभा विघटन गरेर फागुन २१ गतेका लागि निर्वाचनको मिति सिफारिस गरेको थियो। सो निर्णयलाई समर्थन र विरोधमा विभिन्न राजनीतिक दल विभाजित रहेका बेला राष्ट्रपति पौडेलले सबै दलका प्रतिनिधिलाई छलफलका लागि बोलाएका हुन्।
शितल निवास स्रोतका अनुसार बैठकको उद्देश्य निर्वाचनलाई सफल र सर्वस्वीकार्य बनाउन राजनीतिक सहमति र समन्वयको वातावरण तयार गर्नु हो। राष्ट्रपति पौडेलले संविधानअनुसार निर्वाचन समयमै सम्पन्न हुनुपर्ने भन्दै राजनीतिक स्थायित्वका लागि सबै दलले जिम्मेवार भूमिका खेल्नुपर्ने धारणा राख्ने बताइएको छ।
यता, प्रधानमन्त्री कार्कीले सरकारले निर्वाचन तयारीलाई तीव्र बनाएको र निर्वाचन आयोगसँग नियमित संवाद भइरहेको जानकारी दिने तयारी गरेको बुझिएको छ। उनका अनुसार सुरक्षादल परिचालनदेखि मतदाता नामावली अद्यावधिकसम्मका विषयमा गृह र रक्षा मन्त्रालय सक्रिय रूपमा काम गरिरहेका छन्।
राजनीतिक दलहरूको तर्फबाट हालसम्म विभिन्न प्रतिक्रिया आएका छन्। माओवादी केन्द्रले औपचारिक रूपमा चुनावमा जाने निर्णय गरिसकेको छ भने नेपाली कांग्रेसले अझै अन्तिम निर्णय नलिएर आन्तरिक छलफल जारी राखेको जनाएको छ। रास्वपाले पनि निर्वाचनमा सहभागी हुने नीति लिएको छ। तर, प्रमुख प्रतिपक्षी एमाले भने चुनावमा नजाने र प्रतिनिधि सभा पुनःस्थापनाको पहल गर्ने तयारीमा रहेको बताइएको छ।
एमाले स्रोतका अनुसार, हालको राजनीतिक अवस्था संविधान विपरीत रहेको र चुनावको सिफारिस असंवैधानिक भएको दाबी गर्दै उनीहरूले सर्वोच्च अदालतमा मुद्दा दायर गर्ने तयारी गरेका छन्। त्यही कारणले पनि शितल निवासको आजको बैठकलाई अत्यन्तै महत्वपूर्ण रूपमा हेरिएको छ।
बैठकमा राष्ट्रपति पौडेलले सबै दलहरूलाई लोकतान्त्रिक प्रक्रियाप्रति आस्था राख्न र निर्वाचनमार्फत नयाँ जनादेश प्राप्त गर्न आह्वान गर्ने तयारी गरेको शितल निवास स्रोतले जनाएको छ।
राजनीतिक विश्लेषकहरूको भनाइमा, शितल निवासमा हुने यो छलफलले आगामी राजनीतिक दिशाबारे स्पष्ट संकेत दिनेछ। यदि सबै दलहरूबीच सहमति कायम भयो भने निर्वाचन प्रक्रिया सहज रूपमा अघि बढ्ने सम्भावना देखिएको छ, अन्यथा पुनः राजनीतिक अनिश्चितता चर्किन सक्ने अनुमान गरिएको छ।
शुक्रबारको बैठकमा प्रधानमन्त्री सुशीला कार्की, माओवादी केन्द्रका अध्यक्ष पुष्पकमल दाहाल, कांग्रेस सभापति शेरबहादुर देउवा, एमाले अध्यक्ष केपी शर्मा ओली, रास्वपाका रवि लामिछानेसहित प्रमुख दलका नेताहरू सहभागी हुनेछन्।
