२० भदौ,जनकपुरधाम । मैथिली साहित्य समाजको आयोजनामा हुँदै आएको मासिक कविगोष्ठीको १५१औँ श्रृंखला कृष्णाष्टमीका दिन सम्पन्न भएको छ।
कार्यक्रमका संयोजक काशीकान्त झा ‘रसिक’ले नियमित रूपमा आयोजना हुँदै आएको मासिक कविगोष्ठीले मैथिली साहित्यमा निरन्तर सिर्जनाको वातावरण निर्माण गर्न महत्वपूर्ण भूमिका खेलिरहेको बताए।
उनले मैथिली भाषा तथा साहित्यको विकासका लागि मैथिली साहित्य समाजले लामो समयदेखि विभिन्न गतिविधि सञ्चालन गर्दै आएको उल्लेख गर्दै मासिक कविगोष्ठीलाई नयाँ तथा पुराना स्रष्टाबीच सिर्जनात्मक संवादको माध्यमका रूपमा अघि बढाइएको बताए।
झाका अनुसार साहित्यिक गतिविधिलाई निरन्तरता दिँदै नयाँ पुस्तालाई मैथिली भाषा र साहित्यसँग जोड्नु अहिलेको प्रमुख आवश्यकता हो। “मैथिली साहित्यको समृद्ध परम्परालाई जोगाउँदै नयाँ पुस्ताका स्रष्टालाई प्रोत्साहन गर्न यस्ता नियमित साहित्यिक कार्यक्रमले महत्वपूर्ण आधार तयार गर्छन्,” उनले भने।
कृष्णाष्टमीकै दिन कविगोष्ठी १५१औँ श्रृंखलासम्म आइपुग्नु कार्यक्रमको निरन्तरताका दृष्टिले समेत महत्वपूर्ण रहेको आयोजकले जनाएको छ।
मैथिली साहित्यमा नयाँ सिर्जनालाई प्रोत्साहन गर्नुका साथै स्रष्टाहरूलाई आफ्ना रचना प्रस्तुत गर्ने अवसर प्रदान गर्ने उद्देश्यले मासिक कविगोष्ठी आयोजना हुँदै आएको छ।
कार्यक्रममा उपस्थित कविहरूले आ–आफ्ना कविता तथा रचना प्रस्तुत गरेका थिए। कविहरूले मैथिली भाषा, संस्कृति, समाज, प्रेम तथा समसामयिक विषयवस्तु समेटिएका रचना प्रस्तुत गर्दै साहित्यिक वातावरणलाई थप सिर्जनात्मक बनाएका थिए।
कार्यक्रममा मैथिली भाषा तथा साहित्यको वर्तमान अवस्था, सिर्जनाका नयाँ प्रवृत्ति तथा साहित्यिक गतिविधिलाई थप प्रभावकारी बनाउने विषयमा समेत सहभागीबीच विचार–विमर्श गरिएको थियो।
