३० असार, धरान | सुनसरीमा भिनाजुले गोली प्रहार गरेर सालीको हत्या गरेको प्रहरीले जनाएको छ। जिल्ला प्रहरी कार्यालय सुनसरीका अनुसार हरिनगर गाउँपालिका–६ महरम चौकमा भारतबाट हतियारसहित ससुराली आएका भिनाजुले गोली प्रहार गरी सालीको हत्या गरेका हुन्।
भारतको पत्रहा पंचायत–१६ का २९ वर्षीय अजाद मियाँ जटले गोली प्रहार गरेर सोमबार बिहान १८ वर्षीया आरसी खातुनको हत्या गरेको सुनसरीका डिएसपी योगराज खतिवडाले बताए। गोली हान्ने मियाँ जट फरार भएको डिएसपी खतिवडाले बताए।
मियाँ जटको खोजीकार्य भइरहेको सुनसरीका प्रहरी प्रमुख एसपी सुमनकुमार तिम्सिनाले बताए। घटनास्थलबाट पेस्तोलमा लाग्ने एकथान गोली बरामद गरिएको उनले बताए।
