भदौ १०, जनकपुरधाम।कमला नगरपालिका, धनुषामा MIS अपरेटरका रूपमा कार्यरत दिपेन्द्र कुमार झाले सामाजिक सुरक्षा योजनासँग सम्बन्धित गम्भीर अनियमितताको आरोप सार्वजनिक गरेका छन्। उनले भने अनुसार, नगर प्रमुख, प्रमुख प्रशासनिक अधिकृत र अर्का MIS अपरेटरको संलग्नतामा मृत व्यक्तिको विवरणको दुरुपयोग गरी करिब २ लाख रुपैयाँ हिनामिना भएको थियो।
दिपेन्द्रले थपे कि, आफ्नो उजुरीका कारण मन्त्रालयले कार्य सम्पादन मूल्याङ्कन सन्तोषजनक नभएको चिठी पठाएको र आफुलाई कार्यालयबाट हटाउने प्रयास भइरहेको छ। उनले आफ्नो बयानलाई पुष्टि गर्दै सामाजिक सञ्जालमार्फत सबैलाई जानकारी गराउन चाहेको बताएका छन्।
“सत्य सत्य हुन्छ। चाहे संसार पुरै गलत बाटोमा गएपनि म एक्लै विपरीत बाटोमा हिँड्न तयार छु,” दिपेन्द्रले भने। उनले आफ्नो इमान्दारिता, निष्पक्षता र सत्यतालाई विश्वासयोग्य बताउँदै आफन्त, साथी तथा इष्टमित्रबाट आउने मानसिक सन्तुलनसम्बन्धी आरोपप्रति पनि स्पष्ट प्रतिक्रिया दिएका छन्।
दिपेन्द्रले लेखेका छन“भोलिको दिनमा मेरो जागिर भए नभए पनि म आफ्नो छोराछोरीलाई शिक्षा दिनेछु – जीवनमा गल्ती नगरे कहिले पनि कोहीसँग नडराउनु।” उनले आफ्नो यो लडाई व्यक्तिगत र न्यायको लागि लडिने प्रतिज्ञा पनि सार्वजनिक गरेका छन्।
