श्रावण ९, महोत्तरी।लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले मधेश आन्दोलनका नेता–कार्यकर्तामाथि लगाइएको झुटा मुद्दा फिर्ता लिन प्रधानमन्त्री केपी शर्मा ओलीलाई आग्रह गरेका छन्।
महोत्तरीको मटिहानी नगरपालिका–८ स्थित विग्घी नदीमाथिको पुल र वडा नं. ६ मा निर्माण गरिएको प्रसूति गृहको उद्घाटन समारोहमा प्रधानमन्त्री ओलीको उपस्थितिमा बोल्दै ठाकुरले आन्दोलनका उपलब्धिलाई अपमानजनक तरिकाले विफल पार्न खोजिएको गुनासो गरे।
उनले भने, “मधेश आन्दोलनका नेता–कार्यकर्तालाई झुटा मुद्दा लगाएर जन्मकैदको सजाय सुनाइएको छ भने कति अझै जेलमा छन्। यस्ता मुद्दाहरू तत्काल फिर्ता हुनुपर्छ। आन्दोलनको उपलब्धिलाई सम्मान गरिनुपर्छ।”
अध्यक्ष ठाकुरले मधेश आन्दोलन शान्तिपूर्ण राजनीतिक आन्दोलन भएको स्मरण गराउँदै राज्यद्वारा गरिएका ज्यादती र मुद्दाहरूप्रति खेद व्यक्त गरे। उनले प्रधानमन्त्रीकै उपस्थितिमा सार्वजनिक रूपमा उठाइएको मागलाई गम्भीरतापूर्वक लिनुपर्ने बताए।राज्यद्वारा दमन र विफल न्यायप्रणालीको आलोचना
ठाकुरले आन्दोलनको दौरान राज्य पक्षबाट गरिएका दमनकारी कदम र त्यसपछि लगाइएका मुद्दाहरू राजनीतिक प्रतिशोधका रूपमा व्याख्या गर्दै न्याय प्रणालीले मधेशको आन्दोलन र न्यायका लागि उठेका आवाजलाई सुन्न नसकेको आरोप लगाए।
उनको भनाइ अनुसार, आन्दोलनमा सहभागी कैयौँ युवाहरू हाल पनि निर्दोष भएर जेलमा छन् भने कति वर्षौंदेखि मुद्दाको पर्खाइमा छन्। “यो लोकतान्त्रिक मुलुकमा स्वीकार्य होइन,” उनले जोड दिए।
