कात्तिक ८, काठमाडौ । प्रधानमन्त्री सुशीला कार्कीको उपस्थितिमा शनिबार साँझ बालुवाटारमा दुई घण्टा लामो उच्चस्तरीय सुरक्षा बैठक सम्पन्न भएको छ। देशभर बढ्दो सुरक्षा चुनौती र हालै देखा परेका राजनीतिक गतिविधिलाई ध्यानमा राख्दै गरिएको उक्त बैठकमा आन्तरिक शान्ति–सुरक्षासम्बन्धी समग्र स्थिति र सम्भावित जोखिमबारे विस्तृत मूल्यांकन गरिएको स्रोतले जनाएको छ।
बैठकमा गृहमन्त्री ओमप्रकाश अर्याल, प्रधानमन्त्रीका सुरक्षा सल्लाहकार, सशस्त्र प्रहरी, नेपाल प्रहरी र राष्ट्रिय अनुसन्धान विभागका प्रमुखहरू सहभागी रहेका थिए। गृहमन्त्री अर्यालले बैठकपछि पत्रकारहरूसँग कुरा गर्दै पछिल्ला गतिविधिहरूका कारण सिर्जित सुरक्षा चुनौतीबारे सूक्ष्म अध्ययन र मूल्यांकन गरिएको जानकारी दिए।
उनका अनुसार हालै दुर्गा प्रसाईँ समूहले अघि सारेका राजनीतिक मागहरूबारे पनि बैठकमा गम्भीर छलफल भएको थियो। मन्त्री अर्यालले भने, “राजनीतिक मागहरू राख्न सबै नागरिक स्वतन्त्र छन्, तर त्यसका लागि शान्तिपूर्ण माध्यम र संवादको बाटो नै उपयुक्त हो। सरकार शान्तिपूर्ण अभिव्यक्तिको सम्मान गर्छ, तर हिंसात्मक या अराजक गतिविधि सह्य हुनेछैन।”
बैठकमा देशका विभिन्न स्थानमा आयोजित प्रदर्शन, सामाजिक अस्थिरता र सीमावर्ती सुरक्षा अवस्थाको समीक्षा समेत गरिएको थियो। प्रमुख सुरक्षा निकायहरूले सरकारलाई सुरक्षाको दृष्टिले संवेदनशील क्षेत्रहरूमा सतर्कता बढाउन सिफारिस गरेको बताइएको छ।
प्रधानमन्त्री कार्कीले सुरक्षा निकायहरूलाई संयम, पेशागत निष्पक्षता र जनताको अधिकारको सम्मान गर्दै शान्ति–सुरक्षा सुनिश्चित गर्न निर्देशन दिएकी छन्। उनले नागरिकको असन्तुष्टिलाई संवाद र विश्वासका माध्यमबाट समाधान गर्न सरकार प्रतिबद्ध रहेको स्पष्ट पारेकी छन्।
बैठकमा आगामी केही दिनभित्र हुन सक्ने प्रदर्शन वा आन्दोलनका गतिविधिलाई ध्यानमा राख्दै सम्भावित आकस्मिक योजना (contingency plan) तयार पार्ने निर्णय समेत गरिएको छ। बालुवाटार स्रोतका अनुसार सरकारले आगामी चरणमा सबै पक्षलाई संवादमा ल्याउन पहल गर्ने तयारी गरेको छ। सरकारले शान्ति र स्थायित्वलाई सर्वोच्च प्राथमिकता दिँदै सबै सुरक्षा संयन्त्रहरूबीच समन्वय बढाउने निर्णय गरेको छ।
