पुस २८, तेहरान। ईरानमा पछिल्लो दुई हप्तादेखि जारी महँगीविरुद्धको आन्दोलन उग्र बन्दै गएको छ। सरकारको कडा चेतावनीका बाबजुद पनि शनिबार र आइतबार ठूलो सङ्ख्यामा सर्वसाधारण सडकमा उत्रिएपछि अवस्था थप तनावग्रस्त बनेको हो। प्रदर्शनकारीहरूले आफूहरू आन्दोलनबाट पछि नहट्ने स्पष्ट संकेत दिएका छन्।
राजधानी तेहरानसहित देशका १०० भन्दा बढी सहरमा फैलिएको आन्दोलनका क्रममा फायरिङ, तोडफोड र आगजनीका घटनाहरू भएका छन्। यी घटनामा परी हालसम्म सयौँ मानिसको ज्यान गएको छ।
अमेरिकी संस्था ह्युमन राइट्स एक्टिभिस्ट्स न्यूज एजेन्सी का अनुसार सुरक्षा बल र प्रदर्शनकारीबीच भएको झडपमा हालसम्म ५३८ जनाको मृत्यु भएको छ। मृतकमध्ये ४८ जना सुरक्षाकर्मी रहेको उक्त संस्थाले जनाएको छ।
तर ईरानको अर्ध–सरकारी समाचार एजेन्सी तस्नीम ले भने १०९ जना सुरक्षाकर्मीको मृत्यु भएको पुष्टि गरेको छ। तस्नीमका अनुसार इस्फहान क्षेत्रमा मात्र ३० जना सुरक्षाकर्मी मारिएका छन्। यद्यपि प्रदर्शनका क्रममा मारिएका प्रदर्शनकारीहरूको संख्या भने सार्वजनिक गरिएको छैन।
यसैबीच, देशभरबाट १० हजार ६७० जनालाई पक्राउ गरिएको सरकारी स्रोतलाई उद्धृत गर्दै समाचारमा जनाइएको छ। बढ्दो महँगी, बेरोजगारी र आर्थिक संकटको विरोधमा सुरु भएको आन्दोलनले अहिले व्यापक राजनीतिक र सामाजिक असन्तोषको रूप लिएको विश्लेषण गरिएको छ।
