१९ फागुन, काठमाडौं । इजरायल र अमेरिकाले इरानमाथि गरेको सैन्य हमलापछि मध्यपूर्व क्षेत्रको अवस्था तनावग्रस्त बनेको छ। आक्रमणको प्रत्युत्तरमा इरानले खाडी क्षेत्रका विभिन्न देशतर्फ मिसाइल र ड्रोन प्रहार गरिरहेको अन्तर्राष्ट्रिय सञ्चारमाध्यमहरूले जनाएका छन्।
क्षेत्रीय सुरक्षा अवस्था जटिल बन्दै गएपछि अमेरिकी विदेश मन्त्रालयले आफ्ना नागरिकलाई १४ खाडी तथा मध्यपूर्वी देश तत्काल छाड्न निर्देशन दिएको छ। मन्त्रालयले सुरक्षा जोखिम उच्च रहेको भन्दै सम्भावित थप सैन्य गतिविधिबाट जोगिन यस्तो आग्रह गरेको हो।
इरानले खाडी क्षेत्रमा रहेका अमेरिकी सैन्य अड्डा तथा रणनीतिक संरचनालाई लक्षित गर्दै आक्रमण तीव्र पारेको बताइएको छ। पछिल्ला घटनाक्रमले ऊर्जा आपूर्ति, अन्तर्राष्ट्रिय उडान र समुद्री यातायातमा समेत असर पार्न सक्ने चिन्ता बढेको छ।
मध्यपूर्वमा तीव्र बन्दै गएको यो सैन्य तनावले विश्व समुदायलाई गम्भीर चासोमा पारेको छ। कूटनीतिक समाधान खोज्न विभिन्न देशहरूले आह्वान गरिरहेका छन्।
