काठमाडौं, असोज १९ – हालै नेपालमा परेको अविरल वर्षा, बाढी र पहिरोबाट व्यापक जनधनको क्षति भएको घटनाप्रति भारतका प्रधानमन्त्री नरेन्द्र मोदीले गहिरो दुःख व्यक्त गरेका छन्। उनले नेपालका जनता र सरकारप्रति सहानुभूति जनाउँदै भारत जुनसुकै सहयोगका लागि सदैव तयार रहेको बताएका छन्।
सामाजिक सञ्जाल एक्स (Twitter) मार्फत प्रतिक्रिया जनाउँदै प्रधानमन्त्री मोदीले भनेका छन्,
> “नेपालमा हालै भएको वर्षा र बाढीका कारण जनधनको क्षति पीडादायी छ। एक मैत्रीपूर्ण छिमेकी र पहिलो प्रतिक्रियाकर्ताको रूपमा, भारत आवश्यक पर्ने कुनै पनि सहयोग प्रदान गर्न प्रतिबद्ध छ र हामी यस कठिन समयमा नेपालका जनता र सरकारको साथमा छौं।”
नेपालमा शुक्रबार र शनिबार लगातार परेको भारी वर्षाका कारण देशका विभिन्न भागमा ठूलो क्षति भएको छ। बाढी, पहिरो र डुबानका घटनामा अहिलेसम्म ४९ जनाको ज्यान गएको र दर्जनौं बेपत्ता तथा घाइते भएको सरकारी तथ्याङ्कले देखाएको छ।
अविरल वर्षाले पूर्वदेखि पश्चिमसम्मका राजमार्गहरू अवरुद्ध बनाएका थिए। अहिले केही स्थानमा पानी घट्दै गएपछि राजमार्ग र सडकहरू खुलाउने काम सुरु भएको छ। विशेष गरी मधेश, बागमती र कोशी प्रदेशका जिल्लाहरू — रौतहट, बारा, धनुषा, चितवन, मकवानपुर र मोरङ — मा ठूलो जनधनको क्षति भएको छ।
नेपाल सरकार र स्थानीय प्रशासनले राहत तथा उद्धार कार्य तीव्र बनाइरहेका छन्। सेनाको सहयोगमा प्रभावित क्षेत्रहरूमा उद्धार, खाना, पानी र स्वास्थ्य सेवाका सामग्रीहरू पु¥याउने काम जारी छ।
भारतीय प्रधानमन्त्री मोदीको यो प्रतिक्रिया नेपालप्रति भारतको सहानुभूति र सहकार्यको सन्देशका रूपमा लिइएको छ। अघिल्ला वर्षहरूमा पनि भारतले प्राकृतिक विपद्का समयमा नेपाललाई तत्काल सहयोग गर्दै आएको छ।
विपद् व्यवस्थापन प्राधिकरणका अनुसार बाढीले हजारौँ घर डुबानमा परेका छन् भने सयौँ परिवार अस्थायी शिविरमा बसोबास गर्न बाध्य भएका छन्। विभागले अझै पनि केही स्थानमा पानीको सतह उच्च रहेको जनाउँदै सतर्कता अपनाउन आग्रह गरेको छ।
वातावरणमा सुधारको संकेत देखिए पनि सम्बन्धित निकायले बाढी र पहिरोको जोखिम सकिन बाँकी रहेको बताउँदै स्थानीय बासिन्दालाई सुरक्षित स्थानमै रहन अनुरोध गरेको छ।
