१५ असार, काठमाडौं । अभूतपूर्व तातो लहर (हिटवेभ) का कारण युरोपभर जनजीवन नराम्ररी प्रभावित भएको छ। विश्व स्वास्थ्य संगठन (डब्ल्यूएचओ) का अनुसार हालैको अत्यधिक गर्मीका कारण युरोपमा १ हजार ३०० जनाभन्दा बढीको ज्यान गइसकेको छ।
डब्ल्यूएचओका महानिर्देशक टेड्रोस अधानोम गेब्रेयससले सामाजिक सञ्जाल एक्स (ट्विटर) मा जानकारी दिँदै गत २१ जुनयता युरोपमा उच्च तापक्रमसँग सम्बन्धित यी अतिरिक्त मृत्युहरू दर्ता भएको पुष्टि गरेका हुन्।
‘मौन हत्यारा’ बन्दै गर्मी, नयाँ कीर्तिमान कायम
गर्मीयामको सुरुवाती चरणमै युरोपेली मुलुकहरूमा गर्मीले पुराना रेकर्डहरू तोड्न थालेको छ। बीबीसीका अनुसार जर्मनी, पोल्यान्ड र चेक गणतन्त्रमा तापक्रमले नयाँ कीर्तिमान कायम गरेको छ भने यो भीषण तातो लहर अहिले पूर्वी युरोपतर्फ तीव्र रूपमा फैलिरहेको छ।
महानिर्देशक टेड्रोसले गर्मीका कारण शरीरमा पर्ने अत्यधिक तनावलाई ‘मौन हत्यारा’ (साइलेन्ट किलर) को संज्ञा दिएका छन्। उनले चिन्ता व्यक्त गर्दै युरोपका घर, कार्यालय र विद्यालयहरू यस्तो चरम मौसमी तापमानको सामना गर्न सक्ने संरचनागत रूपमा तयार नरहेको समेत बताए। उनका अनुसार युरोप विश्वमै सबैभन्दा तीव्र गतिमा तातिरहेको महादेश हो, जहाँ विश्वव्यापी औसतको तुलनामा करिब दोब्बर दरले तापक्रम वृद्धि भइरहेको छ।
फ्रान्समा मात्रै १ हजार अतिरिक्त मृत्यु
यसैबीच, फ्रान्सको राष्ट्रिय स्वास्थ्य मन्त्रालयले जारी गरेको तथ्यांक अनुसार गत बुधबारदेखि यता देशभर सामान्य अवस्थामा भन्दा करिब १ हजार बढी मानिसको मृत्यु भएको छ।
मन्त्रालयका अनुसार यसरी ज्यान गुमाउनेमा अधिकांश ६५ वर्ष वा सोभन्दा माथिल्लो उमेर समूहका ज्येष्ठ नागरिकहरू रहेका छन्। यो अवधिमा घरमै ज्यान गुमाउनेहरूको संख्यामा समेत करिब ४० प्रतिशतले वृद्धि भएको मन्त्रालयले जनाएको छ।
