२६ जेठ, काठमाडौ । — सेयर कारोबारसम्बन्धी विवादका कारण पदबाट राजीनामा दिएका गृह मन्त्री सुधन गुरुङ २६ दिनमै पुनः गृह मन्त्रालयमा फर्किने भएका छन्।
छानबिन समितिले उनीमाथि लगाइएका आरोप पुष्टि नभएको निष्कर्ष निकाल्दै क्लिन चिट दिएपछि गुरुङले पुनः गृह मन्त्रीको जिम्मेवारी सम्हाल्न लागेका हुन्। उनको शपथ ग्रहण कार्यक्रम आज दिउँसो ३ बजे शीतल निवास मा हुने तयारी गरिएको छ।
गुरुङले सेयर कारोबारसम्बन्धी विवाद सार्वजनिक भएपछि नैतिक जिम्मेवारी लिँदै पदबाट राजीनामा दिएका थिए। त्यसपछि सरकारले गठन गरेको छानबिन समितिले सम्बन्धित विषयमा अनुसन्धान गरेको थियो। समितिको प्रतिवेदनपछि उनीमाथिका आरोप पुष्टि हुन नसकेको निष्कर्ष सार्वजनिक भएको हो।
गृह मन्त्रालयमा पुनरागमनसँगै गुरुङले पुरानै शक्तिशाली जिम्मेवारी सम्हाल्ने भएका छन्। सुरक्षा प्रशासन, शान्ति सुरक्षा तथा विपद् व्यवस्थापनजस्ता संवेदनशील क्षेत्रको नेतृत्व फेरि उनकै हातमा जाने भएको छ।
राजनीतिक वृत्तमा उनको यो पुनरागमनलाई महत्त्वपूर्ण घटनाका रूपमा हेरिएको छ। समर्थकहरूले आरोपबाट मुक्त भएपछि उनको राजनीतिक हैसियत अझ बलियो बनेको दाबी गरेका छन् भने आलोचकहरूले भने मन्त्रालयमा फर्किएपछि उनको कार्यशैली र निर्णयलाई नजिकबाट मूल्याङ्कन गर्ने बताएका छन्।
२६ दिनको अन्तरालपछि गृह मन्त्रालयमा फर्किएका गुरुङको दोस्रो इनिङ्स कत्तिको प्रभावकारी र आक्रामक हुन्छ भन्ने विषय अब राजनीतिक र प्रशासनिक वृत्तको चासोको केन्द्र बनेको छ।
