मंसिर ४, काठमाडौ । आगामी प्रतिनिधि सभा निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउन राष्ट्रिय सुरक्षा परिषद्ले सेना परिचालन गर्ने निर्णय गर्दै सरकारसमक्ष त्यसका लागि औपचारिक सिफारिस गर्ने भएको छ।
सिंहदरबारस्थित कार्यालयमा बसेको परिषद्को ४१औं बैठकले फागुन २१ गते निर्धारित प्रतिनिधि सभा निर्वाचनमा सुरक्षाको संवेदनशीलता उच्च रहेको निष्कर्ष निकाल्दै सेना परिचालन अपरिहार्य ठहर गरेको हो। यस सम्बन्धमा मन्त्रिपरिषद्को निर्णयका लागि शीघ्र सिफारिस अघि बढाइने परिषद्का सदस्य–सचिव तथा रक्षा सचिव सुमनराज अर्यालले जानकारी दिए।
रक्षा सचिव अर्यालका अनुसार, निर्वाचन प्रक्रियालाई स्वतन्त्र, निष्पक्ष र कुनै पनि प्रकारको भय–त्रास रहित वातावरणमा सम्पन्न गराउने उद्देश्यले सेना परिचालनको सिफारिस गरिएको हो। उनका भनाइमा, व्यापक सुरक्षा जोखिमका संकेत र विभिन्न क्षेत्रबाट आएका सूचनाका आधारमा परिषद्ले यस्तो निष्कर्षमा पुगेको हो।
बैठक प्रधानमन्त्री सुशीला कार्कीको अध्यक्षतामा बसेको थियो। बैठकमा परिषद्का सदस्यहरू—अर्थमन्त्री, गृहमन्त्री, मुख्य सचिव, प्रधानसेनापति तथा रक्षा सचिव—सहितको सहभागिता थियो।अब परिषद्को सिफारिस मन्त्रिपरिषद्मा पुगेपछि सरकारले आवश्यक प्रक्रिया अघि बढाई औपचारिक निर्णय गर्ने अपेक्षा गरिएको छ।
