२ फागुन , जनकपुरधाम। यही फागुन २१ गते हुने प्रतिनिधि सभा सदस्य पदको निर्वाचनलाई लक्षित गर्दै धनुषा निर्वाचन क्षेत्र नम्बर–३ मा चुनावी गतिविधि तीव्र बनेका छन्। विभिन्न दलका उम्मेदवार आ–आफ्ना एजेण्डासहित मतदातामाझ पुगिरहेका बेला राष्ट्रिय स्वतन्त्र पार्टी (रास्वपा) का उम्मेदवार मनिष झा घरदैलो अभियान, भेटघाट तथा अन्तरक्रियामा सक्रिय देखिएका छन्।
युवा पुस्ताको प्रतिनिधित्व गर्दै चुनावी मैदानमा उत्रिएका झाले आफ्नो अभियानलाई ‘साफ राजनीति, उत्तरदायी नेतृत्व र विकासमुखी प्रतिबद्धता’मा केन्द्रित गरेको बताएका छन्। उच्च शिक्षा हासिल गरेका झा विभिन्न सामाजिक तथा व्यावसायिक क्षेत्रमा संलग्न रहँदै आएका छन्। अध्ययनशील र तथ्यमा आधारित तर्क प्रस्तुत गर्ने शैलीका कारण उनी स्थानीय बहस तथा सार्वजनिक सुनुवाइमा सक्रिय रूपमा चिनिन्छन्।
चुनावी अभियानका क्रममा झा दैनिक रूपमा टोल–टोलमा पुगेर मतदातासँग प्रत्यक्ष संवाद गरिरहेका छन्। शिक्षा, स्वास्थ्य, रोजगारी र पूर्वाधार विकासलाई प्राथमिकतामा राख्ने प्रतिबद्धता व्यक्त गर्दै उनले स्थानीय आवश्यकता अनुसार विकास योजना अघि बढाउने बताएका छन्।
घरदैलो कार्यक्रममा सहभागी एक स्थानीय मतदाताले भने, “उहाँले हाम्रो कुरा ध्यान दिएर सुन्नुहुन्छ, नोट गर्नुहुन्छ र समाधानका सम्भावनाबारे स्पष्ट धारणा राख्नुहुन्छ।”
झाले निर्वाचनलाई जित–हारको प्रतिस्पर्धाभन्दा पनि जनताको विश्वास र जिम्मेवारी बोक्ने अवसरका रूपमा लिएको बताएका छन्। उनको चुनावी एजेण्डामा स्थानीय सडक स्तरोन्नति, कृषि उत्पादनको बजारीकरण, युवाका लागि सीपमूलक तालिम तथा रोजगारी सिर्जना प्रमुख रूपमा समेटिएका छन्। पारदर्शिता र जवाफदेहिता सुनिश्चित गर्ने विषयमा पनि उनले विशेष जोड दिँदै आएका छन्।
रास्वपाले अघि सारेको सुशासन र प्रणाली सुधारको नारालाई उनले क्षेत्रीय आवश्यकता अनुसार स्थानीय विकास योजनासँग जोडेर प्रस्तुत गरिरहेका छन्। झाको अभियानमा युवाहरूको उल्लेखनीय सहभागिता देखिएको छ भने सामाजिक सञ्जालमार्फत पनि उनको टोली सक्रिय छ। उनले युवालाई राजनीतिक प्रक्रियामा सहभागी हुन आह्वान गर्दै ‘अबको राजनीति परिणाममुखी हुनुपर्छ’ भन्ने सन्देश दिँदै आएका छन्।
