१२ बैशाख , काठमाडौ । थापाथलीस्थित बागमती नदी किनारको सुकुम्बासी बस्तीमा शनिबारदेखि डोजर चलाएर संरचना हटाउने कार्य सुरु गरिएको छ। सार्वजनिक जग्गा तथा नदी कोरिडोर अतिक्रमण गरेर निर्माण गरिएका घर–टहरा हटाउने सरकारी अभियानअन्तर्गत बस्तीमा स्काभेटर प्रवेश गरिएको हो।
बस्ती हटाउने क्रममा कुनै अप्रिय घटना नहोस् भन्ने उद्देश्यले नेपाल प्रहरी र नगर प्रहरीको ठूलो संख्यामा परिचालन गरिएको छ। यसपटकको दृश्य भने विगतका प्रयासभन्दा फरक देखिएको छ, जहाँ झडपको अवस्था नआउँदै शान्तिपूर्ण रूपमा बस्ती खाली गराउने प्रयास गरिएको छ।
विशेषगरी सुरक्षाकर्मीहरूले सुकुम्बासी बासिन्दाका सरसामान सुरक्षित रूपमा सार्न सक्रिय भूमिका खेलेका छन्। प्रहरीहरू आफैंले घरभित्र रहेका लत्ताकपडा, भाँडाकुँडा, ग्यास सिलिन्डर, ओछ्यानलगायत सामग्री बोकेर सुरक्षित स्थानमा पुर्याइरहेका छन्, जसले मानवीय दृष्टिकोणलाई प्राथमिकता दिइएको संकेत गरेको छ।
यसअघि यही क्षेत्रमा डोजर चलाउने क्रममा स्थानीय र सुरक्षाकर्मीबीच ढुंगामुढा तथा तनावपूर्ण झडप भएको थियो। तर यसपटक प्रशासनले सहयोगात्मक रणनीति अपनाउँदै बस्ती खाली गराउने प्रयास गरेको देखिन्छ।
सम्बन्धित निकायहरूले यसअघि नै पटक–पटक सूचना जारी गर्दै उक्त क्षेत्र खाली गर्न आग्रह गर्दै आएका थिए। बागमती सभ्यता संरक्षण तथा नदी कोरिडोर विकासको दीर्घकालीन योजनाअनुसार अतिक्रमित संरचना हटाउने अभियानलाई तीव्र बनाइएको हो।
यद्यपि, सरकारको यस कदमले नदी व्यवस्थापन र शहरी योजना सुधार गर्ने लक्ष्य लिएको भए पनि विस्थापित सुकुम्बासीहरूको पुनर्वास र दीर्घकालीन व्यवस्थापनको प्रश्न भने अझै अनुत्तरित नै रहेको छ।
