२२ बैशाख , भारत। भारतको पश्चिम बंगाल विधानसभा चुनावमा भारतीय जनता पार्टी (भाजपा) ले ऐतिहासिक सफलता हासिल गर्दै दुई तिहाइभन्दा बढी बहुमत ल्याएको छ। 294 सदस्यीय विधानसभा मध्ये 293 क्षेत्रमा मतगणना हुँदा भाजपा ले 206 सीट जित्दै स्पष्ट बहुमत प्राप्त गरेको हो। फाल्टा क्षेत्रमा मतदान रद्द भएका कारण बहुमतको वर्तमान आंकडा 147 कायम गरिएको छ।
निर्वाचन आयोगका ताजा तथ्यांकअनुसार सत्तारुढ तृणमूल कांग्रेसले 80 सीट जितेको छ भने 1 क्षेत्रमा अग्रता बनाएको छ। 15 वर्षदेखि राज्यमा शासन गर्दै आएको तृणमूल कांग्रेसको सत्ता यसपटक समाप्त भएको छ।
यो जीतसँगै भाजपा पहिलोपटक पश्चिम बंगालमा सरकार बनाउन सफल हुने भएको छ। पार्टीले शहरी मात्र नभई ग्रामीण क्षेत्रमा समेत आफ्नो जनाधार उल्लेख्य रूपमा विस्तार गरेको देखिएको छ। सन् 2011 मा करिब 4 प्रतिशत मत हिस्सा रहेको भाजपा 2019 मा करिब 40 प्रतिशतसम्म पुगेको थियो भने 2021 को चुनावमा 77 सीट जित्दै मुख्य प्रतिपक्षका रूपमा स्थापित भएको थियो।
चुनाव परिणाममा तृणमूल कांग्रेस प्रमुख ममता बनर्जी आफ्नै क्षेत्र भवानीपुरबाट भाजपा उम्मेदवार शुभेंदु अधिकारीसँग 15,105 मतले पराजित भएकी छन्। यद्यपि, तृणमूलका केही प्रमुख नेताहरूले जित हात पारेका छन्। शोवनदेब चट्टोपाध्याय, फिरहाद हकीम र जावेद खानले आफ्नो सीट सुरक्षित गरेका छन्।
कस्बा क्षेत्रबाट जावेद खानले लगातार चौथो जित दर्ता गर्दै भाजपा उम्मेदवार सन्दीप मुखर्जीलाई 20,974 मतले पराजित गरे। यस्तै, बॉलीगंजमा शोवनदेब चट्टोपाध्यायले 61,476 मतको फराकिलो अन्तरले विजय हासिल गरे भने कोलकाता पोर्टबाट फिरहाद हकीमले 56 हजारभन्दा बढी मतले जित निकाले।
तर, तृणमूलका केही मन्त्रीहरू भने पराजित भएका छन्। उदय गुहा, शशि पांजा र मलय घटकले आफ्नो-आफ्नो क्षेत्रमा हार व्यहोरेका छन्।
अन्य राज्यहरूमा पनि रोचक परिणाम आएका छन्। तमिलनाडुमा अभिनेता विजयको पार्टी ठूलो दलको रूपमा उभिएको छ, यद्यपि कुनै पनि दलले स्पष्ट बहुमत ल्याउन सकेन। केरलमा कांग्रेस नेतृत्वको यूडीएफले वामपन्थी एलडीएफको दशक लामो शासन अन्त्य गर्दै दुई तिहाइ बहुमत प्राप्त गरेको छ। असममा मुख्यमन्त्री हिमन्त विश्व सरमाको नेतृत्वमा भाजपा गठबन्धनले तेस्रोपटक सरकार दोहोर्याएको छ भने पुडुचेरीमा एनडीए गठबन्धनले 30 मध्ये 18 सीट जितेको छ।
