असोज १०, काठमाडौ । नेकपा (माओवादी केन्द्र)ले विशेष महाधिवेशनमा जाने निर्णय गर्दै हालको केन्द्रीय कमिटी विघटन गर्ने घोषणा गरेको छ।
शुक्रबार सम्पन्न केन्द्रीय कमिटीको पूर्ण बैठकले अध्यक्ष पुष्पकमल दाहाल ‘प्रचण्ड’को नेतृत्वमा महाधिवेशनमा होमिने निर्णय गरेको हो।
बैठकपछि नेता देवेन्द्र पौडेलले पत्रकारलाई जानकारी दिँदै भने, “केन्द्रीय कमिटी आयोजक कमिटीमा रूपान्तरण हुने, पदाधिकारी सबै आयोजक कमिटीका सदस्य मात्र रहने र अध्यक्षको संयोजकत्वमा महाधिवेशनमा जाने निर्णय भएको छ।”
पौडेलका अनुसार पार्टीले मंसिर महिनामा विशेष महाधिवेशन गर्ने तयारी गरेको छ।
यो निर्णयसँगै माओवादी केन्द्र अब पूर्ण रूपमा महाधिवेशनतर्फ उन्मुख भएको छ भने भावी नेतृत्व र राजनीतिक दिशाबारे पार्टीभित्र बहस तीव्र हुने देखिएको छ।
