पुस २९, काठमाडौं — ३० पुसमा आयोजना गरिएको राजावादी प्रदर्शनमा सहभागी हुन आह्वान गर्दै एकै दिनमा करिब ५० लाख एसएमएस पठाइएको खुलासा भएको छ। ती सन्देशहरू ‘आकाश एसएमएस’ र ‘एसआई अलर्ट’ जस्ता एसएमएस गेटवे प्रयोग गरी ‘वेदव्यास इन्टरप्राइजेज प्रालि’ को नाममा पठाइएको पाइएको छ।
सम्बन्धित सेवा प्रदायकहरूले सम्झौताविपरीत राजनीतिक तथा विवादास्पद सामग्री पठाइएपछि उक्त प्लेटफर्म ब्लक गरिएको दाबी गरेका छन्। तर, यति ठूलो परिमाणमा मोबाइल नम्बर कहाँबाट संकलन गरियो भन्ने विषयमा गम्भीर प्रश्न उठेको छ। विज्ञहरूका अनुसार लाखौं मोबाइल नम्बरको डेटा ठूला बैंक, दूरसञ्चार सेवा प्रदायक, ई–कमर्स प्लेटफर्म वा सरकारी निकायजस्ता संस्थाबाट बाहेक अन्यत्रबाट प्राप्त हुनु अत्यन्तै कठिन मानिन्छ।
कानुन व्यवसायीहरूले यस घटनालाई गोपनीयताको हनन, अवाञ्छित विज्ञापन तथा दूरसञ्चारसम्बन्धी कानुनको उल्लङ्घन भएको ठहर गर्दै संलग्न पक्षमाथि कडा कारबाहीको माग गरेका छन्। उनीहरूका अनुसार व्यक्तिको सहमति बिना राजनीतिक उद्देश्यका लागि व्यक्तिगत सम्पर्क विवरण प्रयोग गर्नु प्रचलित कानुनी व्यवस्थाविपरीत पर्छ।
यस प्रकरणमा नेपाल दूरसञ्चार प्राधिकरणले समेत चासो व्यक्त गर्दै आवश्यक अनुसन्धान अघि बढाइने संकेत दिएको छ। यस्तै, केन्द्रीय अनुसन्धान ब्युरो (सीआईबी) ले पनि तथ्य संकलन र कानुनी प्रक्रियाअनुसार कारबाहीको सम्भावनाबारे अध्ययन भइरहेको जनाएको छ।
राजनीतिक उद्देश्यका लागि डिजिटल माध्यम प्रयोग गर्दा डेटा सुरक्षा र गोपनीयताको सवाल पुनः बहसको केन्द्रमा आएको यस घटनाले, आगामी दिनमा डिजिटल विज्ञापन र एसएमएस सेवाको नियमन थप कडा बनाउने दबाब दिएको छ।
