असोज २, काठमाडौ । नेकपा एमालेका अध्यक्ष तथा निवर्तमान प्रधानमन्त्री केपी शर्मा ओली सैनिक ब्यारेकबाट बाहिरिएका छन् । जेनजी प्रदर्शनका क्रममा सुरक्षाको कारण देखाउँदै नेपाली सेनाले उनलाई नियन्त्रणमा लिएर ब्यारेकमा राखेको थियो । गत २४ भदौमा प्रधानमन्त्री पदबाट राजीनामा दिएयता ओली सैनिक सुरक्षा घेरामा नै थिए ।
सुरक्षा निकायका अनुसार ओली अहिले भक्तपुरको गुण्डुमा सारिएका छन् । त्यहाँका लागि भाडाको घर व्यवस्थापन गरिएको छ । बालकोटस्थित उनको निवास प्रदर्शनकारीले आगजनी गर्दा पूर्णरूपमा क्षतिग्रस्त भएपछि उनी नयाँ स्थानमा सर्न बाध्य भएका हुन् ।
ओलीलाई गुण्डु सार्ने जिम्मेवारी एमाले पोलिटब्युरो सदस्य महेश बस्नेतले लिएका छन् । बस्नेतले ओलीलाई सार्वजनिक जीवनमा पुनः सक्रिय गराउने उद्देश्यले चाँडै भव्य कार्यक्रम आयोजना गर्ने घोषणा समेत गरेका छन् ।
एमाले निकट स्रोतका अनुसार ओलीको सुरक्षा व्यवस्थामा कडाइ गरिएको छ । आन्दोलनपश्चात् बालकोटमा भएको तोडफोड र आगजनीले पार्टीभित्रै ठूलो असर पारेकाले अब उनलाई राजनीतिक गतिविधिमा कसरी प्रस्तुत गरिन्छ भन्ने विषय एमालेभित्र प्रमुख चासो बनेको छ ।
