१३ फागुन, लाहान । सिराहाको राजनीतिमा आज महत्वपूर्ण मोड आएको छ। नेपाली कांग्रेस का दिग्गज तथा वरिष्ठ नेता, सिराहा क्षेत्र नम्बर १ का पूर्व सभापति अक्षमित लाल चौधरी औपचारिक रूपमा राष्ट्रिय स्वतन्त्र पार्टी (रास्वपा) मा प्रवेश गरेका छन्।
चौधरीको पार्टी परिवर्तनलाई जिल्लाको राजनीतिक वृत्तमा ठूलो धक्काका रूपमा हेरिएको छ। लामो समयदेखि कांग्रेस राजनीतिमा सक्रिय रहँदै आएका उनी संगठन निर्माण, चुनावी रणनीति तथा क्षेत्रीय समन्वयमा प्रभावशाली भूमिका खेल्दै आएका नेता मानिन्थे।
रास्वपाले आयोजना गरेको विशेष कार्यक्रममा उनले नयाँ राजनीतिक यात्राको घोषणा गरेका हुन्। कार्यक्रममा रास्वपाका केन्द्रीय तथा जिल्ला स्तरका नेताहरूको उपस्थिति रहेको बताइएको छ।
पार्टी प्रवेशपछि संक्षिप्त मन्तव्य दिँदै चौधरीले देशमा वैकल्पिक राजनीतिक शक्तिको आवश्यकता महसुस गर्दै आफू रास्वपामा आबद्ध भएको बताएका छन्। उनले सुशासन, पारदर्शिता र नयाँ राजनीतिक संस्कार स्थापित गर्ने उद्देश्यले अघि बढ्ने प्रतिबद्धता व्यक्त गरे।
यस घटनासँगै सिराहा–१ मा आगामी राजनीतिक समीकरण फेरिने संकेत देखिएको छ। कांग्रेसका लागि यो प्रस्थान संगठनात्मक र मनोवैज्ञानिक दुवै दृष्टिले चुनौतीपूर्ण बन्न सक्छ।
