मंसिर २३, रोल्पा। — आगामी २१ फागुनमा निर्धारित प्रतिनिधिसभा सदस्य निर्वाचनका लागि नेपाली कांग्रेसका महामन्त्री गगनकुमार थापाको नाम रोल्पाबाट सिफारिस गरिएको छ। एक मात्र निर्वाचन क्षेत्र रहेको रोल्पा जिल्लाको जिल्ला कार्यसमिति बैठकले आज थापालाई आधिकारिक रूपमा केन्द्रमा सिफारिस गर्ने निर्णय गरेको हो।
जिल्ला सभापति सहितको नेतृत्वमा बसेको बैठकले संगठन सुदृढीकरण, आगामी निर्वाचन तयारी र उम्मेदवार सिफारिससम्बन्धी एजेन्डामा छलफल गर्दै महामन्त्री थापाको लोकप्रियता, राष्ट्रिय पहिचान र संगठनमा नेतृत्वदायी भूमिकालाई आधार मानेर सिफारिस गरेको बताइएको छ।
रोल्पामा कांग्रेसभित्र लामो समयदेखि थापालाई अघि सार्नुपर्ने धारणा रहेको र आगामी चुनावी प्रतिस्पर्धामा उनले प्रभावकारी भूमिका निर्वाह गर्ने अपेक्षा स्थानीय नेतृत्वले व्यक्त गरेको छ। जिल्ला कार्यसमितिको निर्णय केन्द्रमा पठाइएपछि अन्तिम टुंगो पार्टीको केन्द्रीय समितिले गर्नेछ।
रोल्पाबाट थापाको सिफारिसले आगामी निर्वाचनमा कांग्रेसको तयारी र आन्तरिक समिकरणले नयाँ मोड लिनसक्ने राजनीतिक विश्लेषकहरूको आकलन छ।
