३० चैत, काठमाडौ । काठमाडौंमा प्रधानमन्त्री तथा मन्त्रीहरूको सम्पत्ति विवरण सार्वजनिक भएपछि त्यसको स्रोतबारे प्रश्न उठ्न थालेको छ। यसै सन्दर्भमा श्रम संस्कृति पार्टीका अध्यक्ष तथा प्रतिनिधि सभा सदस्य हर्क साम्पाङ ले सरकारसँग सम्पत्तिको स्रोत स्पष्ट पार्न माग गरेका छन्।
सामाजिक सञ्जालमार्फत प्रतिक्रिया जनाउँदै साम्पाङले केवल सम्पत्ति विवरण सार्वजनिक गर्नु पर्याप्त नहुने बताएका छन्। उनले सम्पत्तिको वास्तविक स्रोत खुलाइएन भने त्यसलाई घुमाइफिराइ भ्रष्टाचारकै रूपमा बुझिन सक्ने अवस्था रहने उल्लेख गरेका छन्।
उनका अनुसार सरकारमा रहेका पदाधिकारीहरूको सम्पत्ति विवरण सार्वजनिक हुनु सकारात्मक कदम भए पनि त्यसको आधार र उत्पत्तिबारे स्पष्टता अनिवार्य छ। स्रोत नखुलाइएका सम्पत्तिले जनविश्वास कमजोर बनाउन सक्ने भन्दै उनले पारदर्शिता र जवाफदेहितामा अझ कडाइ गर्नुपर्नेमा जोड दिएका छन्।
साम्पाङको यो अभिव्यक्तिसँगै सार्वजनिक पदाधिकारीहरूको सम्पत्ति विवरण मात्र नभई त्यसको स्रोतसमेत खुलाउनुपर्ने बहस थप चर्किने देखिएको छ।
