मंसिर २३, जनकपुरधाम। राष्ट्रिय मुक्ति पार्टी (रामुपा) नेपाल धनुषा जिल्ला समितिले आगामी फागुन २१ गते हुने प्रतिनिधि सभा सदस्य निर्वाचनका लागि धनुषा–३ क्षेत्रबाट दुई वरिष्ठ नेताहरू—अध्यक्ष राजेन्द्र महतो र उपाध्यक्ष डा. राजीव झा—को नाम सिफारिस गरेको छ। जिल्ला अध्यक्ष राजेश चौधरी ‘राजु’को अध्यक्षतामा बसेको जिल्ला कार्यसमिति बैठकले दुवै नाम सर्वसम्मत रूपमा अनुमोदन गरी केन्द्रमा पठाउने निर्णय गरेको हो।
अध्यक्ष महतो २०७४ को प्रतिनिधि सभा चुनावमा धनुषा–३ बाट कांग्रेस नेता विमलेन्द्र निधिलाई पराजित गर्दै विजयी भएका थिए। २०७९ मा सर्लाहीबाट चुनाव लड्दा भने पराजित भएका उनी पुनः धनुषा–३ मा फर्किने संकेत पार्टीभित्र तीव्र चर्चामा रहेको बैठकमा सहभागी कार्यकर्ताहरूले बताएका छन्। कार्यकर्ताहरूले “अध्यक्ष महतो पुनः धनुषाबाटै प्रतिस्पर्धी बन्नुपर्छ” भन्ने चाहना राखेपछि उनका नाम सिफारिस गरिएको जिल्ला नेतृत्वको भनाइ छ।
यसैगरी, उपाध्यक्ष डा. राजीव झा पनि धनुषा–३ मा उतिकै लोकप्रिय छन्। उनले यसअघि नै यस क्षेत्रबाट चुनाव लड्ने घोषणा गरिसकेका थिए र आवश्यक परे स्वतन्त्र उम्मेदवारका रूपमा प्रतिस्पर्धा गर्ने तयारीसमेत थालेका थिए। जिल्ला समितिले उनको सक्रियता र स्थानीय समर्थनलाई आधार मान्दै उनलाई पनि केन्द्रमा सिफारिस गरेको हो। झाले भने, “अध्यक्ष महतोले धनुषा–३ बाट लड्ने इच्छा प्रकट गरेमा पूर्ण समर्थन रहनेछ,” भनेका छन्।
पार्टीका केही नेताहरूका अनुसार अध्यक्ष महतो सर्लाहीबाट चुनाव लड्ने सोचमा रहेको चर्चा पनि छ, तर जिल्ला स्तरको सिफारिसले अन्तिम निर्णयमा केन्द्रको भूमिकालाई निर्णायक बनाउने देखिन्छ।
बैठकमा जिल्ला समितिका पदाधिकारीहरू, केन्द्रीय उपाध्यक्ष झा, केन्द्रीय सचिव सञ्जय चौधरी, अनुशासन विभाग प्रमुख सञ्जय चौधरी, राजनीतिक समिति सदस्य दीपक यादव र विजय यादवलगायत उपस्थित थिए।
पार्टीले मधेसका अधिकार, समानता, सामाजिक न्याय र जनजीविकाका मुद्दालाई प्राथमिकतामा राख्दै आगामी निर्वाचनमा प्रभावकारी उपस्थिति जनाउने लक्ष्य रहेको जिल्ला नेतृत्वले जनाएको छ।
