कार्तिक ४, मुम्बई । फिल्म उद्योगका दिग्गज हास्य कलाकार गोवर्धन असरानीको ८४ वर्षको उमेरमा निधन भएको छ। लामो समयदेखि बिरामी रहेका असरानीले सोमबार दिउँसो करिब ४ बजे अन्तिम सास लिएका हुन्। उनका भतिजा अशोक असरानीले उनको निधनको पुष्टि गरेका छन्। सास फेर्न गाह्रो भएपछि उनलाई अस्पताल भर्ना गरिएको थियो। चिकित्सकका अनुसार असरानीका फोक्सोमा पानी जमेको कारण उनको स्वास्थ्य अवस्था बिग्रँदै गएको थियो।
असरानी हिन्दी सिनेमाका ती अभिनेतामध्ये एक हुन् जसले पाँच दशकभन्दा बढी समय चलचित्र क्षेत्रमा बिताए। करिब ३५० भन्दा बढी फिल्महरूमा अभिनय गरेका असरानीको हास्य र संवाद प्रस्तुतिको शैलीले दर्शकको मन जितेको थियो। उनको अभिनयले ७० र ८० को दशकका हरेक चर्चित फिल्मलाई बलियो बनायो। दर्शकका साथसाथै समिक्षकहरूले पनि उनको अभिनयको प्रशंसा गर्थे।
सन् १९७० पछि असरानीको लोकप्रियता चुलिएको थियो। उनले मेरे अपने, कोशिश, बावर्ची, परिचय, अभिमान, चुपके चुपके, छोटी सी बात र रफू चक्कर जस्ता फिल्ममा उत्कृष्ट अभिनय गरे। तर उनी सधैंका लागि अमर बने ‘शोले’ फिल्मको “अंग्रेजों के ज़माने के जेलर” पात्रका कारण। उक्त भूमिकाले उनलाई हास्य अभिनयको प्रतीक बनायो र उनको यो संवाद आज पनि दर्शकको जिब्रोमा ताजा छ।
असरानीले मात्र अभिनय होइन, निर्देशन र लेखनमा पनि आफ्नो प्रतिभा देखाएका थिए। उनले ‘चला मुरारी हीरो बनने’ फिल्म लेखे, निर्देशन गरे र आफैं मुख्य भूमिकामा पनि देखिए। साथै, उनले ‘सलाब मेमसाब’ नामक फिल्म पनि निर्देशन गरेका थिए। हिन्दी मात्र नभई गुजराती सिनेमामा पनि उनले उत्कृष्ट अभिनय प्रस्तुत गरेर दर्शकको मन जितेका थिए।
उनका म्यानेजर बाबूभाई थिबाका अनुसार असरानी पछिल्ला केही दिनदेखि बिरामी थिए। सास फेर्न गाह्रो भएपछि उनलाई अस्पताल पुर्याइएको थियो। आज अपराह्न तीन बजे उनको निधन भएको चिकित्सकहरूले पुष्टि गरेका छन्। बाबूभाई थिबाले भनेका छन्, “हामीले उनको अन्तिम इच्छा अनुसार उनको अन्तिम संस्कार निजी रूपमा सम्पन्न गरेका छौं।”
असरानीको अन्त्येष्टि आज साँझ मुंबईको सान्ताक्रूज श्मशान घाटमा गरियो। अन्त्येष्टि कार्यक्रममा उनका परिवारका सदस्य र नजिकका साथीहरू मात्र उपस्थित थिए। उनको इच्छा अनुसार यो कार्यक्रम सार्वजनिक रूपमा जानकारी नगरिएको बताइएको छ।
असरानीका परिवारमा उनकी पत्नी मात्र रहेकी छन्। सन्तान नभए पनि उनले आफ्नो अभिनय, विनम्रता र हँसिलो व्यक्तित्वका कारण असंख्य कलाकारहरूका गुरु र प्रेरणाको रूपमा पहिचान बनाएका थिए।
हिन्दी सिनेमा उद्योगका सहकर्मी, कलाकार र उनका प्रशंसकहरू अहिले उनीप्रति श्रद्धाञ्जली अर्पण गरिरहेका छन्। अभिनय र हास्यको अद्भुत संयोजनका रूपमा असरानीले भारतीय सिनेमा इतिहासमा अमिट छाप छोडेका छन्। ‘शोले’का जेलरदेखि ‘छोटी सी बात’का भोलारामसम्म, असरानीको हाँसो अब सधैं दर्शकको यादमा जीवित रहनेछ।
भारतीय सिनेमाले आफ्नो एक अमूल्य रत्न गुमाएको छ।
श्रद्धाञ्जली — गोवर्धन असरानी (१९४१–२०२५)। 🕯️
