१० बैशाख ,महोत्तरी। जलेश्वरमा बिहीबार साँझ दुई मोटरसाइकल एकआपसमा ठोक्किँदा दुई जना घाइते भएका छन्।
जलेश्वर जिरोमाइल क्षेत्रमा जलेश्वरबाट जनकपुरतर्फ जाँदै गरेको मधेस प्रदेश ०२–०२–००५ प २७५८ नम्बरको मोटरसाइकल र विपरीत दिशाबाट आउँदै गरेको ज ४ प २९९६ नम्बरको मोटरसाइकल एकआपसमा ठोक्किएका हुन्।
दुर्घटनामा जलेश्वर–२ का ३० वर्षीय दिपक साह र जलेश्वर–७ बेलाका ४० वर्षीय सन्जित झा घाइते भएका छन्। दुवैजनाको टाउको, नाक तथा शरीरका विभिन्न भागमा चोट लागेको बताइएको छ।
घाइतेहरूलाई तत्काल प्रादेशिक अस्पताल जलेश्वरमा ल्याई प्राथमिक उपचार गरिएको थियो। तर अवस्था गम्भीर देखिएपछि चिकित्सकले थप उपचारका लागि जनकपुर पठाएको जनाइएको छ।
दुर्घटनामा संलग्न दुवै मोटरसाइकल जिल्ला प्रहरी कार्यालय जलेश्वरको नियन्त्रणमा रहेको प्रहरीले जनाएको छ। घटनाबारे थप अनुसन्धान भइरहेको छ।
