८ बैशाख , काठमाडौ । — गृहमन्त्री सुधन गुरुङमाथि सम्पत्ति विवरणमा महत्वपूर्ण अंश लुकाएको आरोप लागेपछि उनको पद नै संकटमा परेको छ। स्रोतहरूका अनुसार, कुख्यात बिचौलिया दीपक भट्टसँग सम्बन्धित ‘स्टार माइक्रो इन्स्योरेन्स’मा गृहमन्त्री गुरुङको करिब २५ लाख रुपैयाँ बराबरको सेयर रहेको र उक्त विवरण उनले जानाजान सार्वजनिक नगरेको दाबी गरिएको छ।
यो खुलासासँगै गृहमन्त्री गुरुङ गम्भीर नैतिक तथा राजनीतिक दबाबमा परेका छन्। विश्वसनीय स्रोतका अनुसार, रास्वपा सभापति रवि लामिछानेले उनलाई तत्काल बूढानीलकण्ठ बोलाएर स्पष्टीकरण लिएको बताएका छन्।
यता, ग्यालेक्सीखबरलाई प्राप्त जानकारीअनुसार, गृहमन्त्रीलाई पदमा निरन्तरता दिने वा बर्खास्त गर्ने भन्ने विषयमा रास्वपा नेतृत्व र प्रधानमन्त्री बालेन शाहबीच उच्चस्तरीय छलफल भइरहेको छ। सरकारको सुशासन र पारदर्शिताको प्रतिबद्धतामाथि नै प्रश्न उठ्ने सम्भावनाबीच यो निर्णयलाई चासोका साथ हेरिएको छ।
उक्त आरोपबारे गृहमन्त्री गुरुङको औपचारिक प्रतिक्रिया भने सार्वजनिक भइसकेको छैन। यदि आरोप पुष्टि भएमा, यसले वर्तमान सरकारको विश्वसनीयतामाथि गम्भीर असर पार्न सक्ने विश्लेषण गरिएको छ।
