३० चैत , काठमाडौ । मन्त्रीहरूको सम्पत्ति विवरणपछि अखिल (क्रान्तिकारी)को सडक प्रदर्शन, स्रोत खुलाउन माग
प्रधानमन्त्री तथा मन्त्रीहरूको सम्पत्ति विवरण सार्वजनिक भएपछि अखिल (क्रान्तिकारी) विद्यार्थी संगठनले विरोध प्रदर्शन गरेको छ। संगठनले मन्त्रीहरूको सम्पत्ति विवरण मात्र सार्वजनिक गरेर नहुने भन्दै त्यसको आय स्रोतसमेत खुलाउनुपर्ने माग राख्दै सडकमा प्रदर्शन गरेको हो।
प्रदर्शनमा सहभागी विद्यार्थीहरूले सार्वजनिक गरिएको सम्पत्ति विवरण अपूरो रहेको दाबी गर्दै पूर्ण पारदर्शिताको अभ्यास आवश्यक रहेको बताएका छन्। उनीहरूका अनुसार सम्पत्तिको स्रोत नखुलाइएसम्म वास्तविक सुशासन सम्भव नहुने भएकाले सरकारले यस विषयमा गम्भीर बन्नुपर्ने आवश्यकता औँल्याइएको छ।
आन्दोलनका क्रममा प्रदर्शनकारीहरूले विभिन्न नारा लगाउँदै सरकारप्रति असन्तुष्टि व्यक्त गरेका थिए। उनीहरूले गरिबी, बेरोजगारी र सामाजिक असमानताबारे व्यंग्यात्मक नारा लगाउँदै मन्त्रीहरूको सम्पत्तिको स्रोत स्पष्ट गर्न दबाब दिएका छन्।
संगठनले आफ्ना मागहरू सम्बोधन नभए थप सशक्त आन्दोलन गर्ने चेतावनीसमेत दिएको छ। मन्त्रीहरूको सम्पत्ति विवरण सार्वजनिक भएपछि उत्पन्न असन्तुष्टिको राजनीतिक तथा सामाजिक प्रतिक्रिया स्वरूप यो प्रदर्शन देखिएको छ।
