माघ १, काठमाडौ । कमै मात्र सार्वजनिक कार्यक्रमहरूमा उपस्थित हुने काठमाडौँ महानगरपालिकाका प्रमुख तथा राष्ट्रिय स्वतन्त्र पार्टी (रास्वपा) बाट प्रधानमन्त्रीका प्रस्तावित उम्मेदवार बालेन शाह किरात समुदायको ऐतिहासिक यलम्बर संवत् ५०८६ को अवसरमा आयोजित विशेष कार्यक्रममा सम्मानित विशेष अतिथिका रूपमा सहभागी भएका छन्।
किरात सभ्यता, संस्कृति र पहिचानको सम्मान तथा संरक्षणका लागि आयोजना गरिएको उक्त कार्यक्रममा बालेन शाहको उपस्थितिलाई अर्थपूर्ण रूपमा हेरिएको छ। कार्यक्रममा उनले किरात सभ्यता नेपालको इतिहासको महत्वपूर्ण आधार भएको उल्लेख गर्दै विविधता, पहिचान र समावेशितालाई संस्थागत गर्दै अघि बढ्नुपर्ने आवश्यकता औंल्याएका छन्।
कार्यक्रममा किरात समुदायका अगुवा, सांस्कृतिक अभियन्ता तथा विभिन्न क्षेत्रका प्रतिनिधिहरूको उल्लेखनीय सहभागिता रहेको थियो। आयोजकहरूले यलम्बर संवत् किरात समुदायको ऐतिहासिक चेतना र गौरवसँग जोडिएको संवत् भएको उल्लेख गर्दै यसको संरक्षण र प्रवर्द्धनमा राज्यको ध्यान जानुपर्ने माग गरेका छन्।
सार्वजनिक कार्यक्रमहरूमा कम देखिने बालेन शाहको यस कार्यक्रममा उपस्थितिलाई आगामी राजनीतिक भूमिकासँग जोडेर पनि विश्लेषण गर्न थालिएको छ। विशेषतः समुदाय–केन्द्रित सांस्कृतिक कार्यक्रममा उनको सहभागिताले विविध समुदायसँगको सम्बन्ध विस्तार गर्ने सन्देश दिएको टिप्पणी भइरहेको छ।यलम्बर संवत् ५०८६ को अवसरमा आयोजित कार्यक्रममा सांस्कृतिक झाँकी, परम्परागत नृत्य तथा शुभकामना आदानप्रदान गरिएको थियो।
