पुस ११, ढाका। बंगलादेश नेशनलिस्ट पार्टी (बीएनपी) का कार्यकारी अध्यक्ष तथा पूर्वप्रधानमन्त्री खालिदा जियाका छोरा तारिक रहमान करिब दुई दशक लामो निर्वासनपछि स्वदेश फर्किएका छन्। बिहीबार राजधानी ढाकामा आयोजित विशाल जनसभालाई सम्बोधन गर्दै उनले बंगलादेशका लागि आफ्नो राजनीतिक दृष्टिकोण प्रस्तुत गरे।
हजारौँ समर्थकको सहभागिता रहेको र्यालीमा रहमानले लोकतन्त्र, अभिव्यक्ति स्वतन्त्रता र सबै धर्म तथा समुदायबीच सहिष्णुताको आवश्यकता औंल्याए। उनले अमेरिकी नागरिक अधिकार अभियन्ता मार्टिन लुथर किङ जुनियरका चर्चित शब्द “आई ह्याभ अ ड्रिम” स्मरण गर्दै भने, “मेरो पास एक योजना छ”, जसले बंगलादेशलाई समावेशी, लोकतान्त्रिक र न्यायपूर्ण राष्ट्र बनाउने लक्ष्य बोकेको बताए।
तारिक रहमानले लामो समयदेखि देश राजनीतिक अस्थिरता र अधिकार संकुचनको चपेटामा परेको उल्लेख गर्दै अब जनताको चाहनाअनुसार शासन प्रणाली परिवर्तनको आवश्यकता रहेको धारणा राखे। उनले लोकतान्त्रिक मूल्यहरूको पुनःस्थापना, स्वतन्त्र प्रेस, निष्पक्ष न्याय प्रणाली र धार्मिक–सामुदायिक सद्भावलाई आफ्नो प्राथमिकता रहने बताए।
बीएनपी समर्थकहरूका अनुसार रहमानको स्वदेश फिर्तीले पार्टीलाई थप सशक्त बनाउने र आगामी राजनीतिक संघर्षलाई नयाँ दिशा दिने अपेक्षा गरिएको छ। लामो समयपछि सार्वजनिक रूपमा देखिएका रहमानको भाषणलाई बंगलादेशको राजनीतिमा सम्भावित नयाँ मोडको संकेतका रूपमा हेरिएको छ।
