मंसिर २१,काठमाडौं ।– नेपाल राष्ट्र बैंकका गभर्नर डा. विश्वनाथ पौडेलले बैंकिङ प्रणालीभित्र सुरु हुँदै रहेका घुस–चलखेल तथा अनियमित गतिविधिलाई अब कडाइका साथ नियन्त्रण गरिने स्पष्ट चेतावनी दिएका छन्। नेपाल आर्थिक पत्रकार संघ (नाफिज)को वार्षिकोत्सवमा बोल्दै गभर्नर पौडेलले ऋण प्रक्रियालाई सहज बनाइदिने बहानामा हुने बार्गेनिङ, घुस र अवैध शुल्क असुल्ने प्रवृत्तिलाई राष्ट्र बैंकले भ्रष्टाचारको सीमाभित्र राखेर कडा कारबाही अघि बढाउने धारणा राखे।
उनका अनुसार धितो राखेर ऋण लिने व्यक्तिको सम्पत्ति लिलामीको प्रक्रियामा धितो मूल्यांकनका क्रममा देखाइएको मूल्यभन्दा कम मूल्य तोक्ने प्रवृत्ति पनि अब वित्तीय भ्रष्टाचारको रूपमा समेटिने छ। “धितो मूल्यांकन, ऋण स्वीकृति, र लिलामी प्रक्रियामा देखिने कुनै पनि प्रकारको चलखेल अब सह्य हुने छैन,” उनले भने।
गभर्नर पौडेलले विशेषगरी निजी बैंकहरूमा ‘ऋण मिलाइदिन्छु’ भन्ने बिचौलिया र बैंककै केही कर्मचारीबीच हुने बार्गेनिङ तथा घुस असुलीलाई चुनौतीपूर्ण विषयका रूपमा उल्लेख गरे। सरकारी बैंकहरूमा निगरानी गर्न अपेक्षाकृत सहज भए पनि निजी क्षेत्रका बैंकमा यस्ता गतिविधि नियन्त्रण गर्न थप कडाइ आवश्यक रहेको उनको धारणा थियो।
“बैंकिङ प्रणालीप्रति आम नागरिकको विश्वास घटाउने गतिविधि अब सह्य हुँदैन। घुस र अनियमितताबाट ऋण प्रणाली दूषित बनाउने कसैलाई पनि राष्ट्र बैंकले बञ्चित छाड्ने छैन,” गभर्नर पौडेलले चेतावनी दिए।
उनले राष्ट्र बैंकले पारदर्शी, प्रत्याभूत, र न्यायिक बैंकिङ सेवा स्थापना गर्न निरन्तर सुधारका कदम चाल्दै आएको उल्लेख गर्दै आगामी दिनमा नियमन र निगरानीलाई अझ आक्रामक रूपमा अघि बढाइने बताए।
राष्ट्र बैंकले हालै नै बैंक तथा वित्तीय संस्थामा देखिएका अनियमित अभ्यासबारे विशेष अनुगमन सुरु गरेको छ, जसअन्तर्गत बिचौलिया गतिविधि, अवैध शुल्क असुली, र धितो मूल्यांकनमा देखिने हेरफेर प्राथमिकताका विषयका रूपमा पहिचान भएका छन्।
