असोज १३, काठमाडौ । नेपाली कांग्रेसका सभापति तथा पूर्वप्रधानमन्त्री शेरबहादुर देउवाको ससुराली पक्षको घरमा नेपाल प्रहरी केन्द्रीय अनुसन्धान ब्यूरो (सीआईबी) ले आइतबार छापा मारेको छ।
सीआईबी स्रोतका अनुसार देउवाका साला भूषण राणा र उनकी दिदी आरजु राणाका बुवाआमा बस्ने जावलाखेलस्थित दुई छुट्टाछुट्टै घरमा एकैसाथ प्रहरी टोली पुगेको हो। छापामारीको क्रममा भूषण राणा घरमै नभएका तर बुवाआमा उपस्थित रहेको बताइएको छ।
प्रहरीले शंकास्पद नगद वा कागजात रहेको प्रारम्भिक सूचनाका आधारमा छापा मारिएको जनाएको छ। तर छानबिनको क्रममा ठोस प्रमाण भेटिएको/नभेटिएकोबारे आधिकारिक जानकारी अझै सार्वजनिक भएको छैन।
सीआईबी अधिकारीहरूले भने, “स्रोत नखुलेको नगद वा दस्तावेज राखिएको भन्ने सूचनामा आधारित भएर छापामारी गरिएको हो। अनुसन्धान जारी छ।”
यसअघि पनि ठूला राजनीतिक व्यक्तित्व तथा तिनका निकट सम्बन्धित व्यक्तिहरूको घर, कार्यालय वा सम्पत्तिमा प्रहरीको अनुसन्धान बढाइएको छ। देउवाको ससुराली घरमा परेको यस छापाले राजनीतिक वृत्तमा थप तरंग पैदा गरेको छ।
